Таҳририятга мурожаат этган Қарноқ, Сувноқ қишлоқларидан бир гуруҳ муштарийларимиз Корея Республикасига ишлаш учун бориш ниятида экани, лекин, кейинги пайтларда қозоғистонлик фуқароларни Кореяга киритиш қаттиқ назорат остига олиниши билан боғлиқ ўзгаришлар ҳақида савол билан мурожаат этишди.

Бу ҳақда интернет тизимида Қозоғистон Республикаси Ташқи ишлар вазирлигининг расмий маълумоти эълон қилинган. Хусусан, 12 июль куни ҚР Ташқи ишлар вазирлиги департаменти директори Ардақ Мадиев ушбу муаммоли масала юзасидан ўз хулосаларини қуйидагича изоҳлайди. 

Қозоғистон давлати ва Корея мамлакати ўртасида фуқароларнинг визасиз бориш-келиш тартиби 2014 йилдан эътиборан кучга кирган. Лекин, ўша пайтда Кореяга отланган қозоғистонликлар сони 200дан зиёдроқ бўлса, сўнгги уч йилда бу рақам жадал ўсиб 6000дан ошиб кетди. Ғайриқонуний меҳнат муҳожирлари сонининг кескин ўсиб кетиши боис Корея миграция полицияси томонидан Қозоғистон фуқароларини ушбу мамлакатга кириш жараёнида қаттиқ текшириш ва депортация чоралари кўрилишига сабаб бўлди. Агар аҳвол шу тарзда давом этаверса, икки давлат ўртасида 2014 йили жорий этилган визасиз бориш келиш тартиби барҳам топиши ҳам мумкин, – дейди департамент директори А. Мадиев.

Қиссадан ҳисса шуки, айни пайтда олис сафарга отланишнинг мавриди эмас. Ҳар жойни қилма орзу, ҳар жойда бор тошу тарози, деган нақлга амал қилиш мақсадга мувофиқдир.