Вилоятда “Мактабга йўл” умумреспублика хайрия акцияси бошланди

Жанубий Қозоғистонда ҚР Таълим ва фан вазирлигининг ташаббуси билан “Мактабга йўл” анъанавий умумреспублика хайрия акцияси бошланди. Мазкур тадбир жорий йилда “Менинг танловим  – болаларга ёрдам кўрсатиш” шиори остида ўтади. 

Жорий йилнинг август-сентябрь ойларида уюштири­ладиган тадбирнинг мақсади – кам таъминланган ҳамда кўп болали оилаларда тарбияланаётган етим ва ота-она ғамхўрлигисиз қолган болаларга янги ўқув йилига тайёрланишда ёрдам бериш.

Умумреспублика “Мактабга йўл” акциясида барча даражадаги ташкилот раҳбарлари, тадбиркорлар, давлат хизматчилари, ҳукумат ва ноҳукумат ташкилотлар, туман, шаҳар таълим бўлимлари, шунингдек, мактаб директорлари иштирок этадилар.

Ўтган йили ушбу акция доирасида 18510 нафар болага моддий ёрдам кўрсатилган. Шундан 10096 нафарига бюджет маблағи ҳисобидан, қолган 8414 нафарига бюджетдан ташқари маблағ ҳисобидан моддий ёрдам берилди. Болаларга жами 197 млн. 414 минг тенге миқдорида маблағ ажратилди. Унинг 134 млн. 687 минг тенгеси бюджет ҳисобидан бўлса, 62 млн. 727,9 минг тенгеси ҳомийлар ҳисобидан.

Умуман олганда, “Мактабга йўл” акцияси ўтказилаётган 9 йил ичида республика бўйича 2 млн.дан зиёд болага умумий қиймати 15 млрд. тенгелик моддий ёрдам кўрсатилди. Ҳар йили уюштирилаётган мана шундай тадбирларда доимий ҳомийлар ва меценатлар томонидан кўрсатилаётган  ёрдам ва қўлловларнинг ҳиссаси катта.