Жанубий Қозоғистон вилоят Анъаналар ва урф-одатлар маркази, Ёшлар имконият маркази, этномаданият бирлашмалари ва “Нар ТВ” телеканалининг ташаббуси билан Элбоши Н. Назарбаевнинг: “Келажакка йўлланма: маънавий янгиланиш” мақоласида белгиланган вазифалар доирасида “Ақ Отау” ёшлар сайли телевизион лойиҳаси амалга оширилмоқда.

Тадбирнинг мақсади – никоҳ тўй маросимларини тартибга келтириб, тўйгача ўтказилаётган сайр, хорижий давлатлардан кириб келаётган, шариатга тўғри келмайдиган одатлар, дабдабабозлик ва манманликнинг олдини олишдан иборат эди. Тадбирни Анъаналар ва урф-одатлар маркази бўлим мудири Ўмар Мирзабай очди.

– Тўй маросимларини миллатимизнинг унут бўлиб кетаётган урф-одатлари доирасида ўтказиш, дабдабабозлик, ёт одатлардан сақланиш учун “Ақ Отау” телевизион лойиҳасини амалга оширишни режалаштирдик. Халқимиз ойнаи-жаҳон орқали миллий қадриятларимизни қайта тиклаётганимизни, урф-одатларимизни янгилаётганимизни кўриб, хулоса чиқариши керак. Келгусида ушбу кўрсатув турмуш қураётган ёш келин-куёвларга ҳаёт сабоғи бўлиши, замонавий миллий урф-одатларга айланишига ишончимиз комил, – деди Ў. Еркинбайули. 

– Тўйларимиз жуда чегарадан чиқиб кетяпти. Баъзилар вертолёт билан саёҳатга чиқса, баъзилар банклардан кредит олиб, исрофгарчиликка йўл қўйишмоқда. Мана шу дабдабабозликларга барҳам бериш, ота мерос урф-одатларимизни, кийиниш, нутқ маданиятини сақлаб қолиш мақсадида амалга оширилаётган кичик бир лойиҳа бу. Етти отамиздан келаётган миллий удумларимизни етти авлодга етказиб бериш бизнинг олий инсоний фазилатларимиздан бири, – деди Анъаналар ва урф-одатлар маркази раҳбари Жанибек Тағаев.