Ҳозирда Туркистон шаҳри атрофидаги яшил майдонда миллиондан зиёд кўп йиллик дарахт кўчатлари – терак, қайин, қайрағоч, тол, арча ва заранг баравж ўсмоқда. Вилоят марказини ободонлаштириш ва кўкаламзорлаштириш тадбирлари вилоят ҳокими Ўмирзақ Шўкеевнинг шахсий назоратида.

Аввал хабар қилинганидек, шаҳарда яшил майдонлар яратиш, «яшил белбоғ»ни кенгайтириш, мавжуд яшиллик дунёсини муҳофазалаш масаласини мақбул ҳал қилиш учун шаҳар 32 мавзега бўлинган. Туман, шаҳар ҳокимлиги ва бўлим раҳбарлари уларнинг ҳар бири учун шахсан масъулдир. Вилоят марказидаги «яшил белбоғ»ни кўздан кечирган минтақа раҳбари мутасадди ташкилотлар раҳбарларига янгидан ўтқазилган дарахтларни суғоришга алоҳида эътибор қаратишни топширди. Бунинг учун мавзелар ҳудудида қудуқлар қазилган ва ер ости сувларидан фойдаланилмоқда. Ҳар бир мавзеда 10 мингга яқин кўчат бўлиб, уларга томчилатиб суғориш тизими ўрнатилган. Баъзи мавзелар сувни Арис – Туркистон каналидан олмоқда. Кўчаларга тунги чироқлар, ахлат қутилари ва ўриндиқлар ўрнатилди, шунингдек, дам олиш ҳудудларида ва кўчалар бўйлаб фавворалар ишга туширилди. Туркистонни ободонлаштириш ягона тизим бўйича амалга оширилади. Шаҳар ҳудудида велосипед йўллари ётқизилди, майсазор барпо этилди. Қишлоқ ва туманлардан ташриф буюрган фуқаролар иштирокида ҳар ҳафтада 32та мавзеда шанбаликлар уюштирилмоқда. Маълумки, Туркистонда экологик вазиятни яхшилаш юзасидан мажмуавий ишлар олиб борилмоқда. Яшил майдонларни шамол, совуқ ва бошқа ташқи омиллардан ҳимоя қилиш учун вилоят раҳбари топшириғига биноан дарахтлар ҳимоя ипи билан боғланиб, таянч таёқчалар ўрнатилди. Туркистонликлар қатор лойиҳаларни амалга оширишда бевосита иштирок этган, шу сабабли улар «Халқ лойиҳалари» деб номланган.