Туркистон – Шимкент йўналишида жойлашган “Жибек жўли” истироҳат боғи ишга туширилди.
Ақмўла, Алмати ва Қарағанди вилоятларининг Туркистон шаҳрига совғаси бўлган истироҳат боғининг умумий майдони 30 гектарни ташкил этади. 2019 йили қурилиши бошланган иншоотда фавворалар, сунъий тўғон, яшил буталар, дарахтлар экилиб, майсазор тўшалиб, ўриндиқлар ўрнатилган. Шунингдек, спорт билан шуғулланиш учун пиёдалар ва велосипедчилар йўлаги ҳам барпо этилган. Боғни барпо этиш билан бирга, уни салқинлатиш мақсадида ўрнатилган фавворалар тунда ҳам боғга алоҳида файз бағишлаяпти.
 Шаҳар ҳокими Нурбўл Турашбеков шаҳар тараққиётига ташаббус кўрсатиб, ишга бош бўлиб, оқ фотиҳасини бераётган фахрийлар билан бирга янги иншоотларни таништириш пайтида истироҳат боғи хизматини ҳам кўрсатиб ўтди. Нуронийлар шаҳарнинг ижобий ўзгаришлари ҳамда аҳоли қулайлиги учун бажарилаётган эзгу ишлар учун миннатдорчилик билдиришди.
 Таъкидлаш жоизки, бу ердаги ўйин майдончалари хизмати пулли. Аттракционлар ҳақидаги тўлиқ ахборот билан @jibekjoly_park саҳифасида танишишингиз мумкин.