Орис қишлоғида жойлашган Худойберган Ҳайтенов номидаги хусусий мактаб фаолиятини бошлаганига эндигина уч йил бўлса-да, республикамизда кўзга кўринган хусусий илм масканларидан бирига айланиб улгурди. Билим даргоҳида таълим олаётган уч юздан зиёд ўқувчи туман ва вилоят олимпиадаларида фахрли ўринларни эгаллаётганлиги қувонарли ҳол. Мактабда фан ҳафталикларининг юксак савияда уюштирилаётганлиги болаларда билим олишга иштиёқнинг ортишига сабаб бўлмоқда.

Ўтган ҳафтада ўтказилган ўзбек тили ва адабиёти ҳафталиги якунида «Шеъриятга ошуфта қалб» мавзуида ажойиб кеча ўтказилди.

Тадбирга маҳаллий ижодкорлар П. Абдуазимова, А. Абуғаффоров, Соатой Камол қизи, Гули Осиё, С. Зиёбековалар таклиф қилинди. Аълочи ўқувчилар Я. Грейева, И. Равшанбекова, Л. Султонова, И. Абдувалиев, А. Абдужалилов, С. Абдурашидов, Н. Юсанова, Г. Исаевалар ижодкорларнинг шеърларини маромига етказиб, ёд олишди. 9-"А", 9-"Б" синф ўқувчиларининг баҳру байт айтишлари тадбирга ўзгача файз киритди. 

Шоиралар Гули Осиё ва С. Зиёбекова ўз ижод намуналаридан ўқиб беришди ва мактаб кутубхонасига шеърий тўпламларини тақдим этишди. Билим даргоҳининг қисқа вақт мобайнида шундай ютуқларга эришишида ўз касбининг моҳири, билимдон, ташкилотчи раҳбар Ж. Серғалиевнинг ҳиссаси салмоқли эканлиги яққол сезилади.

Тадбир сўнгида сўзга чиққан тадбиркор Р. Ҳайтенов, муаллим А. Тожиевлар мактабнинг ўзбек тили ва адабиёти ўқитувчилари И. Аҳмедов, Н. Нортоева, А. Абдихонова, И. Абдиқодирова, Ш. Қўшоновалар меҳнатини юксак баҳолаб, уларга чексиз миннатдорчик изҳор этди . 

Бадиий сўз устаси И. Аҳмедов олиб борган тадбир мактаб жамоаси, ўқувчилар ва ижодкорлар қалбида узоқ вақт сақланиб қолиши шубҳасиз.