Туркистон шаҳрида “Бахтли оила – ёрқин келажак” мавзуида республика анжумани ўтди. Оиладаги зўравонликнинг олдини олиш мақсадида уюштирилган анжуманда ҳуқуқ-тартибот идоралари раҳбарлари, ҚР Парламенти ва ҚР ИИВ, маҳаллий ижро органи, полиция, прокуратура вакиллари, ота-оналар, оила қадриятларини улуғлаб юрган эл оғалари қатнашди.

Вилоят ҳокими Дархан Сатибалди анжуманда сўз олиб, оиладаги зўравонликнинг олдини олиш, она ва бола ҳуқуқларини ҳимоя қилиш муҳим вазифа эканлигини таъкидлади. 

– Бугунги кунда ахборот технологияларининг ривожланишидан жамиятдаги муносабатлар ва қадриятлар ҳам ўзгаришларга дуч келмоқда. Бир вақтлар болаларни калтаклаб тарбиялаш оддий ҳол бўлган эди, ҳозир у зўравонлик ҳисобланади. Болаларни сматрфонлар тарбияламоқда, десак, муболаға бўлмас. Шу сабабли, янги авлодни шакллантиришда ота-оналарнинг тафаккурини ўзгартириш вақти келди. Биз оиладаги тарбияда тараққиёт мезонларини инобатга олишимиз даркор. Юртимиз болалари бахтиёр ҳаёт кечиришсин, – деган вилоят ҳокими соҳадаги бошқа ишларга ҳам тўхталди. 

Анжуманда вилоят прокурори Мурат Тилеубердиев маъруза қилиб, у зўравонликларнинг сонини камайтиришда жазолаш эмас, олдини олиш ишлари самарадорлироқ бўлишини таъкидлади.

Вилоят Полиция департаменти раҳбари, полиция генерал-майори Мурат Қабденов маиший зўравонликларнинг олдини олиш борасида олиб борилаётган ишларга атрофлича тўхталди. 

Қозоғистон Республикаси Бола ҳуқуқлари бўйича вакил Динара Закиева соҳадаги ишларга тўхталиб, режалар билан ўртоқлашди. 

Жамоат арбоби Ўразкул Асанғази оила қадриятларининг инсон онггига таъсири тўғрисида гапирса, Парламент депутати Даулет Муқаев мавзуга оид масалалар юзасидан фикр билдирди.