Саясат Нурбек: олий таълим ва фан тизимини ривожлантиришга қаратилган қатор ташаббус ва лойиҳаларни тақдим этди.

– Ҳозиргача мамлакатда 25та хорижий олий таълим муассасаларининг бўлимлари очилган. Мамлакатимиздаги олий таълим муассасалари фаолиятини такомиллаштириш ва сифат жиҳатидан юксалтиришга доир муҳим вазифалар белгиланган. ОТМларнинг халқаро эътироф этилган рейтинг агентликлари рўйхатидан жой олиши, жаҳондаги илғор ўқитиш тажрибасидан фойдаланиши шулар жумласидан. Бу ишга хорижий ҳамкорлар ҳам жалб этилиб, ҳудудий давлат университетларини илмий-тадқиқот университетларга айлантириш бўйича келишувларга эришилди, – деди у. 

Вазир жорий йилда талабаларни молиявий қўллаб-қувватлашнинг янги дастаклари жорий этилганини таъкидлади.

– Улар қаторига “Келажак” ягона ихтиёрий жамғарма тизими, “Миллий жамғарма – болаларга!” дастури, соддалаштирилган таълим кредити ва табақалаштирилган грантларни киритиш мумкин. Бу чора-тадбирлар аҳолининг барча тоифалари учун олий таълим олиш имкониятини таъминлашга қаратилган, – деди у. 

Вазир Президентнинг сунъий заковатни ривожлантиришга оид топшириқларининг ижроси ҳақида маълумот берди:

– Ҳозирги кунда 8та олий таълим муассасасида 15та таълим дастури бўйича 2000дан зиёд талаба сунъий заковат йўналиши бўйича таҳсил олмоқда. Рақамли иқтисодиётга мослаштирилган кадрлар салоҳиятини ривожлантириш мақсадида “Google”, “Nvidia”, “Coursera”, “01 Edu System” ва “Huawei” каби трансмиллий компаниялар билан ҳамкорлик йўлга қўйилди.

Сунъий заковат соҳасида мутахассислар тайёрлаш учун «Болашақ» дастури орқали ҳар йили 100та стипендия ажратиш режалаштирилган.

Учрашув якунида Давлат раҳбари ётоқхоналар қуриш, олий таълим ва фан инфратузилмасини янада ривожлантириш юзасидан қатор топшириқлар берди.

– Таълим соҳасидаги истиқболли вазифалар ўзининг долзарблиги ҳамда амалий аҳамияти билан бошқа соҳалардаги ислоҳотлардан асло қолишмайди. Чунки ушбу соҳадаги ишлар инсон захираларини ривожлантиришга боғлиқ бўлиб, илм-фан, инновациялар ва уларни ҳаётга татбиқ қилиш юртимиз келажагини белгилаб беради, – деди Президент.