Тўлебий туманида 2022 йил июнь ойида ленгерлик Ақбўта Қудайбергенова, 2023 йил январь ойида кўксаёқлик Гаухар Бегалиева уч эгизак фарзандларни дунёга келтиргани ҳақида газетамизда ёзилган эди. Уларни туман ҳокими Тўлеген Телғараев, маслаҳат раиси Нурлан Қўйбағаров, табриклаб, совғалар тақдим этганди. Куни кеча ушбу тумандан яна бир хушхабар олдик. Орифбоевлар хонадонида уч эгизак чақалоқ туғилди.

Шимкент шаҳридаги перинатал марказда дунёга келган чақалоқларнинг иккови ўғил, бири қиз. Туман тиббиёт бирлашмасининг берган маълумотларига қараганда она ва болаларнинг аҳволи яхши. Шунга қарамай, улар маълум вақт тиббий назорат остида бўлади. 

Зағамбар қишлоғида истиқомат қилувчи Рўза Мурод қизининг уч фарзандига Умар, Усмон ва Розия деб исм қўйишди. Фарзандларнинг отаси Ўктам – тадбиркор.

Бир мурғак жонни соғлом қилиб, униб-ўстириш қанчалик масъулиятли бўлса, эгиз фарзанд ота-онаси учун янада кўпроқ қийинчилик туғдириши мумкин. Аммо, халқимизда шундай нақл бор: Бир болага етти маҳалла ота-она. Шундай экан фарзанд тарбияси ва ва уни вояга етказишда барча бир-бирига елкадош.

Хушхабар овоза бўлди. Туман ҳокими ва масъуллар «қаҳрамон» онанинг ҳолидан хабар олиб, оилага амалий ёрдам кўрсатади, дея умид қиламиз.