Янги мавзе Қорасув қишлоғидаги 60 гектар майдонни эгаллайди. Янги шаҳарчада жами 2300га яқин хонадонли 47та кўп қаватли уй қад ростлайди, бу ерда 12 мингга яқин аҳоли истиқомат қилади. Қурилиш режаси билан танишган вилоят ҳокими Нуралхан Кўшеров маҳаллий аҳоли билан учрашди.

– Бугун биз Сайрам туманини ривожлантириш бўйича жуда муҳим ташаббуснинг гувоҳи бўлмоқдамиз. Давлат раҳбари халққа Мактубида уй-жой масаласига алоҳида тўхталди. Бу вазифа доирасида вилоятимизда аҳолини уй-жой билан таъминлашга қаратилган аниқ лойиҳалар амалга оширилмоқда. Туманда 63 минг нафардан зиёд фуқаро ер участкасига эга бўлиб, 4 минг нафардан зиёди уй-жой навбатида. Бугун Қорасув қишлоғида 57 гектар майдонда янги аҳоли манзилининг қурилиши бошланди. Бу уй-жой тақчиллигини бартараф этиш ва аҳолининг ижтимоий шароитини яхшилашга қаратилган лойиҳадир. Янги кичик туманда кўплаб ижтимоий иншоотлар барпо этилиб, ҳудуднинг тараққиётига хизмат қилади. Аҳоли ҳаёт сифатининг муҳим кўрсаткичи уй-жой ҳисобланади. Эҳтиёжмандларни уй-жой билан таъминлаш, турмушини яхшилаш, жамият салоҳиятини юксалтиришга етакчилик қилиш ҳар бир ҳокимнинг бурчидир. Шундай экан, бунинг учун бор куч-ғайратимизни ишга солишимиз керак, – деди Нуралхан Кўшеров.

Янги кичик туманда маъмурий бино, 600 ўринли янги замонавий мактаб, 280 ўринли болалар боғчаси, кунига 250 кишини қабул қилишга мўлжалланган янги поликлиника, Маданият уйи ва Ёшлар саройи қад ростлайди. Сайрам туманида 4206 нафар фуқаро давлат уй-жой жамғармасидан уй-жойга муҳтож сифатида рўйхатга олинган.

Вилоят ҳокими фуқароларни тозаликка риоя қилиш, кўкаламзорлаштиришга ҳисса қўшишга чақирди ва санитария бўлими ходимларига алоҳида миннатдорчилик билдирди.

Сайрам туманида маҳаллий бюджетдан 455 миллион тенге маблағ ажратилиб, 20дан зиёд махсус техника харид қилинди. Бунинг учун вилоят бюджетидан 175 миллион тенге ажратилди. “Тоза Қозоғистон” дастури доирасидаги тизимли ишлар амалга оширилмоқда.