Тулкибош туманида “Қирмизи адир” деган тепалик бор. Ҳар йили 10-15 кун давомида бу ер лолалар билан қопланади. Қозоғистоннинг фахри бўлган, кейинчалик улардан жуда кўп маданий навлар чиқарилган Грейг ва Кауфман лолалари бетакрор манзара кашф қилади.

Тулкибош туман ҳокимлиги, “Оқсув-Жабағли” қўриқхонаси маъмурияти ва “Южный Казахстан” газетаси таҳририяти ҳамкорликда қўшма акция ўтказишди. Фестиваль давомида мактаб ўқувчилари экология мавзусида чизган суратлари, ясаган амалий санъат намуналарини намойиш  этдилар. Лоланинг жаҳондаги барча маданий турларининг аждоди бўлган миллий бойлигимизни асрашимиз зарурлиги тилга олинди.

– Қир-адирлардаги лолаларни пайҳонлаш – табиатга улкан зарар етказиш демакдир, – деди Тулкибош тумани ҳокими ўринбосари Жанар Бектаева. – Ердаги лоланинг пиёзи қазиб олинаверса, яна бир гўзалликни абадий йўқотамиз. 

Бугунги кунда табиий лолалар Қизил китобга киритилган. Уларни юлган, пайҳонлаганларга жарима солинади, ҳатто қамоқ жазоси берилади. 

– Аммо биз жазодан қўрқиб эмас, табиатимизни севиб яшашимиз керак, – деди “Оқсув-Жабағли” қўриқхонаси директори А. Менглибаев. – Лола сайлига чиққанда уни юлавермайлик. Аксинча, чиройидан завқланишга шошилайлик. Ахир лола – элимизнинг бойлиги!

С. ИСАМАТОВ  сурати.