Тулкибош туманидаги “Байтерек 4” МЧБнинг сабзавот консервалаш цехи иш суръатини ошириб, йилига 1,5 минг тоннага яқин 28 хил маҳсулот ишлаб чиқармоқда. 

Шу кунларда тадбиркор маҳсулотларнинг асосий қисмини Алмати шаҳри ва Ғарбий Қозоғистон вилоятларига жўнатмоқда. Қувонарлиси шуки, экологик тоза маҳсулотларга хитойликлар ҳам қизиқиш билдирмоқдалар.

– Кундан-кунга маҳсулотимизга талаб кучаймоқда. Истеъмолчиларнинг буюртмаларига кўра, яқин хориж давлатларига ҳам экспорт қилишни бошладик. Ёзда 40 киши ишлайдиган корхонамизда ҳозир 20 нафар ишчи меҳнат қилмоқда, – деди биз билан суҳбатда директор ўринбосари Бахитжан Ўспанов. – Қайта ишланадиган сабзавот Сайрам туманидан ташқари, Қирғизистон ва Ўзбекистондан ҳам келтирилмоқда. Бу борада туман ҳокимлиги билан ҳамкорликда иш олиб бормоқдамиз. 

Таъкидлаш жоиз, “Байтерек 4” МЧБнинг сабзавотни консервалаш базаси 2015 йили “Бизнеснинг йўл харитаси – 2020” дастури доирасида иш бошлаган. Смета баҳоси 115 миллион тенге. Корхона Хитой, Россия ва Болгарияда ишлаб чиқарилган замонавий ускуналар билан жиҳозланган.