1 май – Қозоғистон халқи бирлиги кунини бутун ёш-қари интиқлик билан кутиши сир эмас. Чунки, у кекса авлод вакиллари хотирасида шодлик ва бахт байрами сифатида сақланиб қолган бўлса, ҳозирги ёшлар 1 майни турли миллат ва элат вакилларининг ҳамжиҳатлик айёми тариқасида нишонлашади. 

Бу гал бирдамлик байрами Сайрам тумани маркази – Оқсувкент қишлоғидаги марказий истироҳат боғида ўтди. Сайилгоҳга кираверишда этномаданият бирлашмалари вакиллари ўз миллий қадриятларини кўз-кўз қилувчи кўргазмалар ташкил қилишди. Шуни алоҳида таъкидлаш жоизки, бошқа ҳамюртларимиз қатори, ўзбек халқининг бой маданий меросини намоён этувчи турли ҳунармандчилик буюмлари, миллий либослар, моҳир қўлли ўқувчи-ёшлар томонидан ясалган буюмлар, ранг-баранг кашталар, расмлар кўргазмасини бу гал Қорабулоқ, Манкент, Қорамурт ва бошқа қишлоқлардан келган мактаб ўқувчилари намойиш этишди. 

Айниқса, Равшанбек Шожалилов етакчилик қилаётган 104-сонли асосий ўрта мактабнинг 8-синф ўқувчиси Моҳидил Аҳмедова томонидан тайёрланган бежирим буюмлар, 41-, 17-сонли мактаб ўқувчи қизларининг қўлбола сувқовоқлари, майда тошлардан териб, тайёрланган шакллар, шунингдек, Анортоев, Наметов, 3-сонли Ҳамза номли, “Ойнабулоқ” сингари таълим муассасаларида таҳсил олаётган ёшлар қўлида шакл олган чиройли пайпоқлар, сунъий гуллар, расмлар байрам қатнашчиларини бефарқ қолдирмади. 

Қорабулоқдаги 77-сонли Ҳамза номли мактаб ўқувчилари тайёрлаган ўзиюрар роботлар эса тантана қатнашчиларини лол қолдирди. 

Саҳнада эса турли тилларда Она-ватан, дўстлик, бирдамликни улуғловчи куй-қўшиқлар янграб, ўзбек, қозоқ, рус, турк, татар халқларининг рақслари ижро этилди. Яна ёш спортчилар, М. Анортоев раҳбарлигидаги маҳаллий цирк артистларининг чиқишлари айёмга ўзгача шукуҳ бағишлади. 

Қозоғистон халқи бирлиги айёмида Сайрам тумани ҳокими С. Сапарбаев, Қозоғистон халқи Ассамблеяси раисининг собиқ муовини Р. Холмуродов ва бошқа расмий кишилар ҳозир бўлишди. 

Ўша куни туманнинг бошқа қишлоқларида ҳам байрам кенг нишонланди.