Элбоши Қозоқ миллий санъат университетининг 20 йиллик юбилейига бағишланган тантанали концертга ташриф буюрди. Қозоғистон Президенти тадбир иштирокчиларини дорилфунуннинг 20 йиллиги билан табриклаб, катта маданият ўчоқлари пойтахтимиз мартабасини янада оширишини айтди.

– Ижодкор зиёлилар пойтахтнинг маданий ҳаётига муҳим ҳисса қўшиб келмоқда. Мен Астанага Алмати ва бутун Қозоғистондан маданият соҳасининг энг яхши вакилларини чақирдим. Дунёда кўплаб университетлар мавжуд, бироқ Санъат университети фақат Астанада қад кўтарди. Ҳозирги кунда пойтахтда Опера ва балет театри, Хореография академияси, Марказий концерт зали ва яна бошқа маданият масканлари очилди. Буларнинг барчаси элимизнинг келажаги учун, маданиятимиз ва санъатимиз учун қилинмоқда, – деди Нурсултан Назарбаев.

Давлат раҳбари Санъат университетининг қаддини тиклаб, ривожланишида унинг маъмурияти ҳамда профессор-ўқитувчилар жамоасининг ҳиссаси катта эканини айтди.

– Университет қошида коллеж, бакалавриат, магистратура ва докторантуралар ҳам бор. Уларда 3 мингга яқин талаба таълим олмоқда. 20 йил ичида университетнинг 500дан зиёд битирувчиси халқаро кўрик ва танловлар ғолиби бўлишди. Сизларга муваффақият ёр бўлсин, Ватанимиз – Қозоғистон Республикасининг обрўсини юксалтирадиган атоқли санъат усталари етишиб чиқиши ва янги номларнинг танилишига тилакдошман! – деб тадбирга якун ясади Элбоши.