Туркистондаги қурилиш ишларига 500дан зиёд йигит-қиз жалб этилади

Элбоши “Ёшлар йили”нинг очилиш маросимида янгидан тузилган Туркистон вилоятига алоҳида эътибор қаратди. Шу муносабат билан барча ёшлар муқаддас шаҳарда амалга оширилаётган ишларда иштирок этиши кераклигини таъкидлади. 

– Ҳозир бутун Қозоғистонда кенг қамровли қурилиш ишлари юритилмоқда. Уйлар, заводлар қурилмоқда. Биз ёш пайтимизда, талабалик чоғимизда махсус талабалар отрядлари бор эди. Таътил пайтида ишлаб, кўп пул топар эдик. Шу сабабли қурилиш ишларига ёшларни жалб этишни топшираман, – деди Давлат раҳбари.

Шу билан бирга Элбоши вилоят маркази – Туркистон шаҳрида қурилиш жадал олиб борилаётганини айтди. 

– Туркистон вилоят маркази сифатида ҳадемай улкан шаҳар бўлади. Унинг бунёд этилишида ёшлар ташаббускор бўлишлари керак. Ҳукумат вилоят ҳокими билан биргаликда ушбу масалани назоратга олиши зарур, – деди Элбоши.

Бугунги кунда Элбошининг сиёсатини қўллаб-қувватлаган ёшлар Туркистон вилояти қурилишида қатнашиб, минтақани юксалтиришга шай туришибди.

Туркистон вилоятида “Яшил эл” дастури доирасида йил сайин 1275 нафар йигит-қиз иш билан таъминланмоқда. “Диплом билан – қишлоққа” лойиҳаси доирасида 913 ёш мутахассис ишга жойлашса, 314 нафари бошпанага эга бўлди. 

Элбошининг Фармонига мувофиқ, ёшларга ижтимоий қўллов кўрсатиш мақсадида бу йил туман ва шаҳарлардан 500дан зиёд ёшларни Туркистон шаҳридаги қурилиш ишларига жалб этиш учун “Туркистон ёшлар қурилиш отряди” тузилди. Айни пайтда пудратчи компаниялар билан шартномалар тузилмоқда.