Вилоятимизнинг Сариоғоч туманида йилига 4200 тонна маҳсулот берадиган йирик иссиқхона бор. Ҳозир бу ерда иш қизғин. Лойиҳанинг  умумий  қиймати 1,8 млрд. тенге бўлиб, унда замонавий технологиялар асосида помидор ҳамда бақлажон етиштирилмоқда. Қоплонбек қишлоқ округида 2009 йили барпо этилган “Жабай ата” деҳқон хўжалигининг фаолияти билан яқиндан танишган журналистлар бунга амин бўлишди.

– Умумий ер майдони 30 гектар бўлса, шундан 28 гектарида иссиқхона барпо этганмиз.  24 гектарга помидор, 4 гектарига эса бақлажон экдик. Жами 840 минг туп кўчат ўтқазилди. Бу ерда томчилатиб суғориш усули қўлланилмоқда.Технологияга кўра, сифатли маҳсулот олиш учун барча шароитлар яратилган. Демак, экилган ҳар туп ниҳолдан 4-5 кило ҳосил оламиз. Муҳими, унга эҳтиёж юқори, – дейди  хўжалик раҳбари Э. Тўрабеков.

 Иссиқхонада 80 киши меҳнат қилади. Тайёр маҳсулот минтақамиздан ташқари, Астана, Алмати шаҳарлари, шимолий вилоятларга юборилади. Маҳсулотнинг тенг ярми Россияга экспорт қилинади.

Саноқли кунларда севиб истеъмол қилинадиган бақлажоннинг “Блекберн” нави дастурхонларимизни безайди.