Туркистон шаҳрига Алмати – Ашхобод йўналиши бўйича ҳаракатланадиган “Silk road train” туристик поездида 100 нафарга яқин чет эллик сайёҳ ташриф буюрди. Улар вилоятимизнинг қадимий ёдгорликлари ва табиати билан танишади. 

Саёҳатчиларни туркистонликлар темир йўл вокзалида кутиб олишди. Шаҳарни бир кун давомида оралаган меҳмонлар Х. А. Яссавий мақбарасида бўлиб, тарихий обидадаги ёдгорликлар билан танишдилар, янги вилоят маркази мақомига эга бўлган шаҳарнинг ривожланиш кўрсаткичларидан хабардор бўлдилар. 

– Ушбу туристик поезд йилига 4 маротаба, яъни, баҳорда икки, кузда икки марта сафарга чиқади. Бу йил Польша, Эстония, Канада ва бошқа мамлакатлардан 92 нафар саёҳатчи келди. Айни пайтда Туркистонга келаётган туристлар сони ортмоқда, – деди туризм ва ташқи алоқалар бошқармаси бошлиғининг ўринбосари Жасулан Тўлебеков. 

Хориждан келган меҳмонлар мақбара атрофида жойлашган этноовулда бўлиб, миллий таомлардан тановул қилишди. Тарихий маълумотларга эга бўлиб, улкан таассуротлар олишди.