Вилоят ҳокими Ўмирзақ Шўкеев иш сафари билан Сайрам туманига борди. Минтақа раҳбари дастлаб Сайрам тумани ҳудудидан ўтадиган вилоят аҳамиятига эга КХ-97 “Оқсув – Шимкент” автомобиль йўлини қайта қуриш ишлари билан танишди. Шундан сўнг, туман ҳокими У. Садибеков билан “Ғамхўрлик” дастури доирасида бошпанали бўлган қорасувлик кўп болали онанинг уйига бориб, уларнинг турмуш шароити билан танишди.

Ўмирзақ Естайули шундан сўнг вилоят аҳамиятига эга КХ-3 автомобиль йўлининг аҳволи билан танишиб, унинг таъмирга муҳтожлигига амин бўлди. Туман марказида олиб борилган ободонлаштириш ишларини кўрган вилоят раҳбари 500 ўринли туман касалхонаси ва “Тез ёрдам” бекатида юритилаётган қурилиш ишлари билан танишди. Мазкур тиббиёт муассасалари яқин кунларда фойдаланишга топширилади.

Ў. Шўкеев Сайрам туманига иш сафарини Оқсувкент қишлоқ округида бунёд этилган «АЙКАН» МЧБ сут заводининг тантанали очилиш маросими билан якунлади. 

«Минтақалар тадбиркорлигини қўллаш харитаси» доирасида ишга туширилган завод қурилишига «Бизнеснинг йўл харитаси – 2020» дастури доирасида 100 млн. тенге берилган, шунингдек, 24 млн. тенге сармоявий субсидия билан қўллов кўрсатилган. Бу ерда бир кеча-кундузда 100 тонна сут қайта ишланади. 80 ходим иш билан таъминланган корхонада турк технологияси асосида тўққиз хил пишлоқ ишлаб чиқарилади.