Туркистондаги Р. Сейитметов номли мусиқали драма театрида ёш эстрада хонандаларининг “АРАЙ-2020” танлови ўтди. 25 йилдан буён ўтказилиб келаётган ушбу тадбир буюк мутафаккир Абай Қўнанбайулининг 175 йиллигига бағишланди.

Мақсад – шоир асарларини ёшлар орасида оммалаштириш ва ёш истеъдодлар санъатини қўл­лаб-қувватлаш. 

Танловнинг одилона ўтишини таъминлаш учун халқаро ва рес­публика фестиваллари ғолиби, “Дарын” давлат мукофоти соҳиби, Астана ёшлар театри актёри Адил Ахметов ҳамда вилоят “Арай” ёш хонандалар танловининг 1996 йил бош соврин соҳиби, халқаро “Осиё овози” фестивали ғолиби, қўшиқчи Бауиржан Исаев таклиф этилди.

Танлов натижасига кўра ҳакам­­лар ҳайъатининг қарорига би­ноан қўшиқчилар мусобақасида Аплатон Рақимжан олий ўрин, “Олтин юл­дуз” дуэти биринчи ўринни эгал­лади. Жайна Апсаттар иккинчи, Ардақ Исқақова ва Сат­даулет Сулейменов учинчи ўрин­ларни қўлга киритишди.

Сухандонлик йўналишида эса олий ўрин Инабат Абитхан қизи, биринчи ўрин Нурайим Тўлебекка насиб этди. Жасмина Анарбек иккинчи, Дастан Алжанов ҳамда Нуркен Абдирахман учинчи ўрин­ларни эгаллади. Бундан ташқари, вилоят маданият бошқармасининг махсус мукофоти Мамирхан Жу­батовга, “Кўзимнинг қораси” но­минацияси Ернур Алибек, “Томо­шабин танлови” номинацияси “Ugai” гуруҳи, “Ҳакамлар ҳайъа­тининг махсус мукофоти” Айжан Пиримжарга топширилди. 

Шунингдек, маданий тадбир бошловчилари Абзал Қуралбаевга вилоят маданият бошқармасининг махсус мукофоти, “Ўлан – сўзнинг подшоси” номинацияси Алтинай Ширинханга, “Томошабин танлови” номинацияси Нурсултан Ўтарга тақдим этилди.