Сайрам тумани ҳокими Арман Сабитов раислигида этномаданият бирлашмалари вакиллари билан учрашув ўтди. Унда тумандаги фуқаролик жамият институтларининг таъсирини кучайтириш, галдаги вазифаларни режалаштириш масалалари муҳокама қилинди.

Тадбирни вилоят “Жамоат тотувлиги” муассасасининг Сайрам туман филиали раҳбари Б. Айтбаев очиб, дастлабки сўзни туман ҳокими Арман Сабитовга берди. Ҳоким ҳудуддаги барқарор ижтимоий-сиёсий вазиятга тўхталиб, миллатлараро муносабатларни мустаҳкамлашда ҳар бир фуқаронинг ўрни алоҳида эканлигини таъкидлади.

– Туманда 8та этномаданият бирлашмаси фаолият юритмоқда, – деди у. – Бу – улкан куч. Сизнинг ёрдамингиз ва ташкилотчилик қобилиятингиз туфайли қатор ишлар амалга оширилди.

Учрашув иштирокчилари ўзларини қизиқтирган саволлар билан мурожаат қилишиб, этнослар ўртасидаги муносабатларни мустаҳкамлаш ҳақида фикр алмашдилар.

Йиғилиш якунида туман ҳокими ҳудудда этномаданият бирлашмалар томонидан кўламдор ишлар юритилиши, жумладан, тотувлик ва ҳамжиҳатликни таъминлашга қаратилган маънавий-маърифий, маданий, спорт ва ижтимоий тадбирларни кўплаб ташкил этиш зарурлигини таъкидлади. Шунингдек, у турли этнос вакилларини келгусида туман истиқболи йўлида ҳамжиҳатликда ишлашга чақирди.