Яқинда вилоятимизнинг барча минтақаларида бўлгани каби Сайрам тумани маркази – Оқсувкентдаги маданият уйида Қозоғистон халқи тиллари куни кенг нишонланди. 

Маданият уйи даҳлизида уюштирилган таълим муассасалари, этномаданият бирлашмаларининг миллий таомлар, ҳунармандчилик буюмлари ва бошқа кўргазмалари кўпчиликда катта қизиқиш уйғотди. Даставвал мазкур кўргазма билан яқиндан танишган туман ҳокими Б. Мамаев ҳам ўқувчи-талабалар  қўли билан ясалган буюмлар илиқ таассурот қолдирганини яширмади. Таъкидлаш жоизки, Элбошимизнинг “Келажакка йўлланма:маънавий янгиланиш” мақоласида тилга олинган уч тилда таълим бериш ва бу тилларни ҳаётга тўлиқ татбиқ этиш кўрсатмасига мувофиқ, яқиндан эътиборан барча давлат тадбирлари давлат, рус ва инглиз тилларида олиб борилмоқда.  Бу гал ҳам шундай бўлди.

Тадбирда туман ҳокими Бақтиёр Мамаев йиғилганларни байрам билан муборакбод этаркан, давлат тили сиёсатини амалга оширишга ўзининг муносиб ҳиссасини қўшаётган бир гуруҳ фаолларга  махсус дипломлар тақдим этди. Сўнгра ўзбек, турк, корейс, славян ва бошқа этнослар вакиллари минбарга кўтарилиб, давлат ҳамда ўз тилларида дўстлик ва тотувликни тараннум этувчи мазкур байрам билан барчани қутлашди. 

Саҳнада турли тилларда  куй-қўшиқлар, жозибали рақслар ижро этилди. Тиллар байрами тадбирда иштирок этган корхона ва ташкилотлар раҳбарлари, маҳаллий маслаҳат депутатлари ҳамда  этномаданият марказлари вакилларида катта таассурот қолдирди.