Туркистон вилоятида Давлат раҳбарининг топшириқлари асосида вилоят Полиция департаменти ҳамда маҳаллий ижро идоралар ҳамкорлигида «Жамиятда қонун ва тартиб ғоясини илгари суриш бўйича 2025-2030 йилларга мўлжалланган концепция»ни амалга ошириш юзасидан тизимли ишлар олиб борилмоқда. Бу масала вилоят ҳокими Нуралхан Кўшеров раислигида ўтган йиғилишда атрофлича муҳокама қилинди.

Тадбирда вилоят Полиция департаменти бошлиғи ўринбосари Бауржан Жанаев маъруза қилиб, концепцияни амалга ошириш режаси 5та асосий йўналиш ва 55та тадбирни қамраб олишини таъкидлади. Унинг сўзларига кўра, мазкур режада Полиция департаменти ва маҳаллий ижро идоралари зиммасига қатор вазифалар юклатилган.

«Қонун ва интизом» тамойили асосида амалга оширилган чора-тадбирлар натижасида ҳисобот даврида ҳуқуқбузарликлар сони 4,6 фоизга, жиноятлар 4,5 фоизга камайган. Шунингдек, жамоат жойларида содир этилган жиноятлар сони ҳам қисқарган. Натижада, Туркистон вилояти криминоген вазият барқарор бўлган ҳамда жамоат хавфсизлиги юксак даражада таъминланган минтақалар қаторида қайд этилди.

Фуқароларга ҳуқуқий ёрдам кўрсатиш мақсадида жорий йилда «Йўлда қабул» акцияси 23 марта ташкил этилди. Унда 120 нафар мутахассис иштирок этиб, 3 мингдан ортиқ мурожаат кўриб чиқилди ва ҳуқуқий маслаҳатлар берилди.

Гиёҳвандликка оид ҳуқуқбузарликларнинг олдини олиш мақсадида таълим, жамоатчилик ривожланиши, соғлиқни сақлаш бошқармалари ҳамда “Ёшлар имконият маркази” билан ҳамкорликда 883та профилактик тадбир ўтказилди. Шу билан бирга, вилоятда 21та «Ёш соқчи» полиция синфи ташкил этилган бўлиб, уларда 458 нафар ўқувчи таҳсил олмоқда.

Вилоят прокуратураси билан ҳамкорликда амалга оширилаётган «Хавфсиз болалик кафолати» лойиҳаси доирасида мактабларда ҳуқуқий саводхонликни оширишга қаратилган профилактик машғулотлар мунтазам ўтказиб келинмоқда.

Йиғилишда Туркистон вилояти Ижтимоий тараққиёт бошқармаси раҳбари вазифасини бажарувчи Бўлат Жанабил ҳам ахборот-таълим ва тарғибот ишлари натижалари ҳақида маълумот берди. Қайд этилишича, йил бошидан буён «Қонун ва интизом» тамойили доирасида ёшлар ўртасида 329та тадбир ташкил этилиб, қарийб 30 минг нафар ёш қамраб олинган.

Шунингдек, ҳуқуқбузарлик, гиёҳвандлик, қиморбозликка қарамлик, эрта ҳомиладорлик, таъқиб ва тазйиқ ҳолатлари ва безориликнинг олдини олишга қаратилган 956та руҳий-профилактик тадбир ўтказилиб, уларга 70 мингдан зиёд йигит-қиз жалб қилинган.

Йиғилиш якунида вилоят ҳокими Нуралхан Кўшеров Давлат раҳбари топшириқларининг ижросини таъминлаш, ёшлар ўртасида ҳуқуқбузарликларнинг олдини олиш, гиёҳвандлик, қиморбозликка қарамлик ва интернет фирибгарлигига қарши кураш тадбирларини янада кучайтириш юзасидан вазифалар белгилаб берди.

Шунингдек, барча масъул давлат идоралари ва мутасадди ташкилотлар ўртасидаги ҳамкорликни мустаҳкамлаш, «Қонун ва интизом» концепцияси доирасида белгиланган вазифаларнинг тўлиқ ва самарали ижросини таъминлаш, аҳолининг ҳуқуқий маданияти ва ҳуқуқий саводхонлигини юксалтириш ҳамда жамоат хавфсизлигини янада мустаҳкамлаш зарурлиги таъкидланди.