26 март 2017 йил
booked.net
+12
°
C
+12°
+1°
Шымкент
Четверг, 06
Прогноз на неделю
1991 йил 1 апрелдан чиқа бошлаган Туркистон вилоятининг ижтимоий-сиёсий газетаси
Биз ижтимоий тармоқдамиз:
+7(7252) 53-93-17, 53-92-79. janubiy@inbox.ru
+ 7(747) 701-50-55
+ 7(747) 701-50-55
Туркистонда Одил Ёқубов таваллудининг 100 йиллигига бағишланган халқаро хотира кечаси ўтди

1991 йили адиб Одил Ёқубов Қозоғистон ва Ўзбекистон Президентлари Нурсултан Назарбаев, Ислом Каримовлар иштирокида Туркистондаги А. Яссавий мақбараси ёнида ўтказилган тарихий анжуманда фахрий меҳмон сифатида иштирок этганди. Орадан ўтган йиллар давомида ўша эзгу ниятлар рўёбга чиқиб, икки мамлакат ўртасидаги ҳамкорликнинг турли йўналишларида кўплаб хайрли ишлар амалга оширилди. Туркистон шаҳри эса вилоят маркази мақоми билан бирга республика миқёсидаги ҳамда туркийлар оламининг маънавий пойтахти сифатида эътироф этилди.

Одил Ёқубовнинг саксон йиллиги 2006 йили Туркистонда ўша кездаги ХҚТУ вице-президенти Қулбек Ергўбек ташаббуси билан университет маданият саройида ташкил этилган, унда фаоллардан Эркин Жўрабеков, Баҳодир Ҳабибуллаев, Баҳодир Ирисметов, Тўлқин Саидмуродов, Шокир Султонқулов каби ҳимматли инсонлар иштирок этган эди. 

Газетамизда аввал хабар қилинганидек, вилоят маркази мақомига эга бўлган кўҳна шаҳардаги Яссавий мақбараси яқинида қад ростлаган “Фараб” илмий-оммабоп кутубхонаси залида вилоят, шаҳар ҳокимлиги вакиллари, вилоят, шаҳар ҳамда Саврон тумани ЎЭМБ бошқаруви (Б. Ирисметов, Р. Қўчқоров, Қ. Ирисбеков) иштирокида адибнинг 100 йиллигига бағишланган хотира кечаси халқаро миқёсда ташкил этилди. Жанат Шардарбекова раҳбарлик қилаётган кутубхона даҳлизида “Асрлик умр, абадий мерос” деб номланган китоб ва “Жанубий Қозоғистон” нашри кўргазмалари иштирокчиларда катта қизиқиш уйғотди. Мария Куришбаева раҳбарлик қилаётган туркий халқлар кутубхонаси ходимлари ҳам О. Ёқубовнинг ўтган асрда нашрдан чиққан китоблари билан кўргазмада иштирок этди. Туркистон, Кентов шаҳарлари, Саврон тумани ҳамда вилоят фахрий отахону, онахонлари, устозлар ва талабалар ташриф буюрган хотира кечаси вилоят ҳокими ўринбосари Ертай Алтаевнинг табрик нутқи билан бошланди. Кентов шаҳрида Одил Ёқубов номи кўчаларнинг бирига берилган. Қозоқ ва ўзбек адабиётлари дўстлигини тараннум этган мазкур анжуманнинг тарбиявий аҳамияти ҳақида гап борди. Туркистон шаҳри ҳокими Азимбек Пазилбекули туркий оламнинг маънавий пойтахтида ташкил этилган ушбу анжуманнинг барча меҳмонларига самимий ташаккур изҳор этди. Ҳоким Ўзбекистон делегацияси раҳбари, адабиётшунос олим, давлат арбоби Шуҳрат Ризаевга иззат-икром кўрсатиб, кифтига зарбоф тўн ёпди. Туркистон вилояти аҳолиси Одил Ёқубовдек ёзувчи фарзанди бўлганидан ҳақли равишда фахрланади. Тадбирни бошқарган Қозоғистон Ёзувчилар уюшмаси котиби, давлат мукофоти лауреати, профессор Қулбек Ергўбек қозоқ ва ўзбек халқлари туб илдизлари бир туркийлар эканлиги, Одил Ёқубов ва Носир Фозилов каби ўзбек адабиёти классиклари киндик қони Туркистон тупроғида томганлиги барча қозоғистонликлар учун фахр эканлигини ғурар ила таъкидлади. Тошкентдан ташриф буюрган шоир, ёзувчиларни табрикка чорлаган Қ. Ергўбек адибнинг фарзанди Абдумалик Одил ўғлига Тошкентда ўтказилган анжумандаги хизматлари учун миннатдорчилик билдирди. Тошкентдаги Муқимий театрида ўтган ҳафтада ташкил этилган анжуманнинг юксак савияда ўтганлигини эхтиром ила таъкидлаган Абдумалик Ёқубов падари бузруквори таваллудининг 100 йиллиги муносабати билан Ўзбекистон Президенти Шавкат Мирзиёев Фармони билан “Буюк хизматлари учун” ордени топширилганини ғурур билан таъкидлади. Анжуманни ташкил этган вилоят ва шаҳар ҳокимлиги, ҚР Президенти Қ. Тўқаев олиб бораётган ҳамкорлик сиёсатига теран миннатдорчилик билдирди. Хусусан, ёзувчи Қулбек Ергўбек ва фахрий отахон Тўлқин Саидмуродовларга алоҳида раҳматини айтди. 

Одил Ёқубовнинг барча шогирдлари устознинг ҳалол, ҳақиқатпарвар, адолатли инсон бўлгани ҳақида ҳаётий мисоллар келтириб, хотираларини ўртоқлашдилар. ҚР Ёзувчилар уюшмаси аъзолари Абдураҳим Пратов ва Зокиржон Мўминжоновлар бир гуруҳ ижодкорларга Одил Ёқубов номидаги мукофотларни тақдим этди. Ёзувчи- таржимон Долимжон Сайфуллаев адибнинг “Биллур қандил” китобини қозоқчага таржима қилиб, алоҳида китоб ҳолида нашр эттиргани ҳақида газетамизда ёзилганди. У китобни меҳмон ёзувчи ва шоирларга тортиқ қилиб, устозига бағишланган янги шеърини ўқиб берди. Саҳнада Туркистонни, дўстлик, тотувликни ва Ватанни тараннум этувчи қўшиқлар қозоқ ва ўзбек тилларида янгради. Таниқли хонанда Зебинисо Абдолимова ижросидаги оталар ҳақидаги хотира қўшиғи барчага манзур бўлди. 

Анжуманда сўзга чиқиб Одил Ёқубов ҳақида дил каломини изҳор этаман деганлар кўп эди, барчасига навбат етмади. Даврани олиб борган Қ. Ергўбек барча мухлисларга ташрифи учун ташаккур изҳор этди. 

Ш. МАДАЛИЕВ, 2026-11-21, 02:42 32
Сўнгги янгиликлар
Мавзуга оид янгиликлар


Газетанинг янги сони
Хамкорлар
Газета тарихи Давлат хариди Тахририят
Манзилимиз: 160000, Шимкент шаҳри, Тауке хан шоҳкўчаси, 6-уй, 3-қават.
Газета ҚР Маданият ва ахборот вазирлиги томонидан 2020 йил 21 апрелда рўйхатга олиниб, KZ34VPY00022503 гувоҳнома берилган.
Муассис--Туркистон вилояти хокимлиги.
Ношир--"Жанубий Қозоғистон"вилоят ижтимоий-сиёсий газетаси таҳририяти масъулияти чекланган биродарлиги.
©Нашримиздан кўчириб босилганида "Жанубий Қозоғистон газетасидан олинди", манбага юкланиши шарт. Ахборотдан парча олинганда ҳам ҳавола келтирилиши шарт. Ёзма рухсат берилмаса,материалларни тижоравий мақсадларда қўлланиш ман этилади. Барча ҳуқуқлар ҳимояланган.
©Мулк эгаси-"Жанубий Қозоғистон"газетаси.