Давлат раҳбари Арманистон Президентига эҳтиром кўрсатиб, мамлакат Қозоғистон – Арманистон ҳамкорлигини мутлақо янги босқичга кўтаришдан манфаатдор эканини таъкидлади.

– Бугунги келишувлар ўзаро муносабатларни мустаҳкамлашга хизмат қилади. Биз Қозоғистон – Арманистон ҳамкорлигининг асоси бўлган олий даражадаги учрашувларимизга алоҳида эътибор қаратамиз. Қозоғистон Арманистон билан дўстона муносабатларни юксак қадрлайди. Арманистон мамлакатимизнинг ишончли ва давр синовидан ўтган яқин ҳамкоридир. Халқларимизни мустаҳкам дўстлик, умумий тарих ва ўхшаш маданий-гуманитар қадриятлар боғлаб туради. Икки томонлама муносабатлар барча соҳаларда жадал тараққий этаётганини алоҳида таъкидлайман, – деди Қасим-Жўмарт Тўқаев.

Давлат раҳбари бу йил Қозоғистон ва Арманистон ўртасида дўстлик ва ҳамкорлик тўғрисидаги шартнома имзоланганига 25 йил тўлаётганини, бу даврда кенг кўламли институционал база шаклланганини таъкидлади.

– Икки халқ ўртасида савдо-иқтисодий ҳамкорликдан ташқари, маданий-гуманитар алоқалар ҳам жадал ривожланмоқда. Ўтган йили Ереванда Қозоқ театрининг Арманистондаги кунлари ўтди. Келгуси йилда юртингизда қозоқ маданияти ўн кунлигини ташкил этиш режалаштирилган. Бугун сизлар билан биргаликда Қозоғистонда Арманистон маданияти кунларининг очилиш маросимида иштирок этамиз, – деди Қозоғистон Президенти.

Арманистон Президенти Ваагн Хачатурян Қозоғистон билан ўзаро манфаатли ҳамкорликни янада ривожлантириш тарафдори эканини маълум қилди.

– Муқаддас қозоқ заминига келганимдан мамнунман. Қозоғистоннинг тараққиёт суръатлари ва фаровонлиги таҳсинга сазовор. Икки давлат ўртасидаги дўстона муносабатлар узоқ йиллар давом этишига ишончим комил. Чунки унинг тарихий илдизлари чуқурдир. Қозоғистон бизнинг ишончли ва дўстона ҳамкоримиз. Бундан ташқари, икки давлат ўртасидаги иқтисодий алоқалар муваффақиятли ривожланиб бораётганини таъкидламоқчиман, – деди Арманистон Президенти.

Музокаралар чоғида савдо-иқтисодий, транспорт-логистика, қишлоқ хўжалиги, молия, маданий-гуманитар ва рақамлаштириш соҳаларида ҳамкорликни мустаҳкамлаш истиқболлари муҳокама қилинди. Минтақавий ва халқаро кун тартибидаги долзарб масалалар ҳам кўриб чиқилди.

Қасим-Жўмарт Тўқаев Қозоғистон томони Озарбайжон ва Арманистон ўртасида тинчлик келишувига эришиш учун келажакда Алмати майдонини таклиф қилишга тайёрлигини таъкидлади.