Туркистон минтақасида қурилиш суръати авжида. Айниқса, вилоят марказида ишлар қизғин. Истиқболли лойиҳаларни ишлаб чиқишда аҳоли сонининг ортаётгани инобатга олинди, шаҳарни сай­ёҳлик маркази сифатида ривожлантириш мақсадида давлат дастурлари ҳаётга татбиқ этилмоқда. Вилоят ҳокимлигида мазкур лойиҳалар муҳокамасига бағишланган  навбатдаги мажлис ўтди.

Вилоят ҳокими Дархан Сатибалди шаҳарни Бош режа асосида ривожлантириш, ягона меъморий услубга амал қилиш зарурлигини таъкидлади. 

Шунингдек, кўкаламзорлаштириш, дарахтларни кўпайтириш ҳамда бўш ётган ерларни самарали ва сифатли ўзлаштириш юзасидан топшириқлар берди.

Йиғилишда 17та лойиҳа муҳокама қилинди. Шаҳар маданият уйи ва шаҳарга кираверишдаги уйлар қиёфаси, ободонлаштириш лойиҳалари ҳам сараланди. Шунингдек, эшкак эшиш каналининг атрофини сайёҳлик марказига айлантириш, аквапарк, меҳмонхоналар барпо этиш тўғрисида ҳам таклифлар кўрилди. Лойиҳаларни амалга оширишда сармоялар жалб қилинади.