Вилоят ҳокими Дархан Сатибалди раислигида ўтган мажлисда Туркистон шаҳрининг ижтимоий-иқтисодий тараққиёти муҳокама қилинди. Шаҳарга яқин жойлашган ҳудудларда тарихий ва қўҳна ёдгорликлар жойлашганлиги боис, сайёҳлик шунга мутаносиб равишда равнақ топмоқда. Махсус иқтисодий ва индустриал минтақаларнинг мавжудлиги вилоят марказининг равнақига салмоқли ҳисса қўшмоқда. Минтақа раҳбари шаҳар тараққиёти учун зарур инфратузилманинг тўкис эмаслигини таъкидлаб, ишларни жадаллаштиришни топширди.

–Туркистон шаҳрига алоҳида мақомнинг берилиши бежиз эмас. Вилоят марказида аҳоли сони ортмоқда, ишчи кучи ҳам етарли. Барча соҳаларни тараққий эттириш имконияти мавжуд. Халқаро аэропорт барпо этилиши, “Ғарбий Европа – Ғарбий Хитой” автодаҳлизи ва темирйўл тармоғи бўйида жойлашуви  минтақанинг сайёҳлик жозибадорлигини ошириш имконини беради. Яқинда ўтган сармоявий форумда қатор шартномалар имзоланди. Улар шаҳарнинг равнақига ҳисса қўшади, албатта. Бироқ бу билан чекланиб қолмай, сармоя жалб қилиш тадбирларини давом эттириш зарур. 2030 йилга бориб шаҳар ўзини ўзи молиялаштириши лозим. Шу йўналишда ишларни кучайтиринглар, – деди Дархан Сатибалди. 

Мажлисда Туркистон шаҳри ҳокими Азимбек Пазилбекули маъруза қилди. Унинг таъкидлашича, шаҳар аҳолиси 234 мингдан ошди. Ишга яроқлилар 83 минг нафардан ошса, унинг 80 мингги иш билан таъминланган. Жумладан, 30 минг фуқаро ўзини ўзи иш билан таъминлаган. Шаҳар ҳокими ялпи ҳудудий маҳсулот ҳажми 2030 йилга бориб 2,8 баравар оширилишини маълум қилди.

Шаҳарни ривожлантиришнинг асосий йўналиши – сайёҳлик. Сўнгги 2 йилда соҳага 74,2 млрд. тенге сармоя жалб қилинса, жорий йилда уни 53,5 млрд. тенгега етказиш кўзланган. Яқин келажакда 145 млрд. тенгени ташкил қиладиган, 955 иш ўрни очишга имкон берадиган 13та лойиҳани ҳаётга татбиқ этиш режаланган.