Кўчат экиб, боғ яратмоқ дунёдаги энг хайрли ва эзгу амал саналади. Мана шундай қадриятлар йиллар оша авлодлар амалида ҳам давом этиб, “Тоза Қозоғистон” дастури бугун юртимизда Президент ташаббуси билан умуммиллий ҳаракатга айланди. Дарахт экиш ишларига тажрибали боғбону отахонлар бош бўлиб, уларнинг бенуқсон ўсиши йўлида фарзандларга зарурий маслаҳатларини, насиҳатларини ҳам бериб бормоқдалар.

Республика байрами муносабати билан вилоят марказида 100 туп дарахт ўтқазилди. “Тоза Қозоғистон” лойиҳаси доирасида ташкил этилган тадбирда вилоят ҳокими Дархан Сатибалди, давлат идоралари раҳбарлари, зиёлилар, Туркистон шаҳар ўзбек этномаданият бирлашмаси, давлат ҳокимияти ва бошқаруви органлари, коммунал хизмат кўрсатувчи ташкилотлар вакиллари, ишчилар ва шаҳар аҳолиси иштирок этди. 

Улар марказий масжид ҳовлиси, “Карвон сарой” мажмуаси ёнидаги “Арена” олдига ҳамда Туризм университети ёнига манзарали дарахт кўчатлари, шунингдек, терак, қайрағоч ва чинор кўчатлари ўтқаздилар.

Вилоят ҳокими Дархан Сатибалди ушбу ташаббусни қўллаб-қувватлаб, тадбир иштирокчилари билан биргаликда кўчат ўтқазиб, тадбир экологик келажак сари муҳим қадам эканини таъкидлади. 

– Ушбу меҳнатлар самарасидан жойларда турли боғлар яратилиб, яшил майдонлар янада кенгайтирилмоқда. Гўзал шаҳримиз янада ям-яшил, чирой очиб бориши учун барча фуқароларни ушбу ташаббусни қўллаб-қувватлашга чақираман, – деди вилоят ҳокими. – Кўкаламзорлаштириш бўйича тизимли ишлар олиб борилмоқда. Жорий йил охиригача вилоят бўйича 500 минг тупдан ортиқ кўчат экиш режалаштирилган. Ҳозирда бу борадаги ишлар давом эттирилмоқда.