Вилоят ҳокими Нуралхан Кўшеров раислигида Минтақавий сармоявий штабнинг жорий йилдаги дастлабки йиғилиши ўтди. Унда вилоятда амалга оширилаётган 15та лойиҳанинг ижроси ва бошқа долзарб масалалар муҳокама қилинди. Йиғилишда Сайрам тумани ҳокими Арман Сабитов, хусусий тадбиркорлар ва сармоядорлар иштирок этди.

2024 йилда Сайрам тумани иқтисодиётига жалб этилган сармоялар ҳажми 71 651,1 млн. тенгени ташкил этди. Кўрсаткич тегишли даврга нисбатан 19 183,0 млн. тенгега ошган. Ўтган йили жами 11та лойиҳа амалга оширилиб, қиймати 15,5 млрд. тенгени ташкил этди. Натижада 235та янги иш ўрни яратилди.

Бугунги кунда Сайрам тумани ҳудудида «БГҚ ТҮРКІСТАН» МЧБ томонидан буғ-газ станциясининг қурилиш ишлари олиб борилмоқда. 2024 йилда бу ишларга 6,1 млрд. тенге сармоя жалб этилди. Умумий лойиҳа қиймати – 800,0 млрд. тенге. Иншоот ишга туширилгач, 300дан зиёд иш ўрини ташкил этилади. Қурилиш жараёнида 2000 киши иш билан таъминланади. Шу кунларда 60 гектар ер майдонида қурилиш-монтаж ишлари олиб борилмоқда. 2025 йилда газ ва буғ турбиналари, иссиқлик қозонлари, ҳавони совитиш ускуналари, ҳимоя ва ҳисоб-китоб тизимлари каби лойиҳага зарур жиҳозлар етказилади.

Жорий йил Сайрам тумани ҳудудида жами қиймати 62,3 млрд. тенгени ташкил этувчи 21та сармоявий лойиҳани амалга ошириш режаланган. Натижада, 1045 киши иш билан таъминланади. Лойиҳалардан бири – 10 000 бош қорамол учун замонавий бўрдоқилаш майдони, кушхона, совитиш омборлари, музлатгич камералари ва гўштни қайта ишлаш цехини ўз ичига олган мажмуа. «MEAT MAGNAT» қишлоқ хўжалиги ширкати томонидан қурилаётган лойиҳанинг қиймати – 6,7 млрд. тенгени ташкил қилади. Очилиши кутилаётган иш ўринлари сони 50та. Лойиҳа ишга туширилгач, йилига 5000 тонна гўшт қайта ишланади, 50дан зиёд иш ўринлари ташкил этилади. Мажмуа қурилиши 2024 йилда бошланиб, 2027 йилда фойдаланишга топширилади. Ҳозир кунда «Premium Beef Well» МЧБ (Ўзбекистон) билан ҳамкорлик бўйича шартнома имзоланган. Жорий йил июнь ойида 10та чорвачилик мажмуасининг қурилишини якунлаш режаланмоқда.

Жорий йилда Сайрам туманида 5000 бош қорамолга мўлжалланган чорвачилик мажмуаси, кушхона, гўштни чуқур қайта ишлаш цехи ва қонни қайта ишлаш корхонаси фаолияти йўлга қўйилади. «KAZ ECO MEAT» МЧБ томонидан қурилиш ишлари олиб борилаётган лойиҳа қиймати 6,0 млрд. тенгени ташкил қилади. Шунингдек, «GEN GROUP KAZAKHSTAN» МЧБ томонидан иссиқхона мажмуасининг иккинчи босқичи қурилмоқда. Лойиҳа қиймати – 7,2 млрд. тенге. Натижада 60дан зиёд иш ўрни очилади. Йилига 1800 тонна помидор, 1000 тонна банан ва 120 тонна қулупнай етиштирилади. Корхона 5 гектарда банан, 5,5 гектарга помидор, 1 гектарга қулупнай етиштириш учун янги технологияли иссиқхона қуришни режалаштирган.

Шунингдек, туманда махсус техника ишлаб чиқарувчи корхона барпо этилмоқда. «KUZOV KARABULAK» МЧБ томонидан қурилиш ишлари олиб борилаётган лойиҳанинг қиймати 2 500,0 млн. тенге. Лойиҳа ишга туширилгач, 500 киши доимий иш билан таъминланади. Бу ерда йилига 500та тиркама ишлаб чиқарилади. Ҳозирги кунда қурилиш-монтаж ишлари олиб борилмоқда.