Туркистон шаҳридаги “Дўстлик уйи”да Қозоғистон халқи Ассамблеясининг 30 йиллиги доирасида “Шукрона куни”га бағишлаб ўтказилган байрам тадбири шундай номланди.

Тантанали йиғилишда вилоят ҳокими – Қозоғистон халқи вилоят Ассамблеяси раиси Нуралхан Кўшеров, зиёлилар, вилоят ҚХА аъзолари ва фахрийлари, вилоят ҚХА қошидаги “Эл бирлиги” депутатлик гуруҳи аъзолари ва ёшлар иштирок этди.

Байрам тадбирида вилоят ҳокими Давлат раҳбари Қасим-Жўмарт Тўқаевнинг табригини ўқиб эшиттирди ва Шукрона куни барча қозоғистонликларнинг бир-бирига меҳр-оқибат, дўстлик ва ҳурмат рамзига айланганини таъкидлади.

– Шукрона куни ватанпарварлик, бирдамлик ва дўстликнинг ёрқин тимсолидир. Асосий мақсад – ёш авлодни дўстлик, ватанпарварлик руҳида тарбиялаш. Шукрона куни доирасида амалга оширилаётган барча тадбирлар миллий ҳамжиҳатликни, барча юртдошларимизнинг бир-бирига дўстлиги, меҳр-оқибатини мустаҳкамлашга хизмат қилади. Фурсатдан фойдаланиб, сизларни Қозоғистон халқи Ассамблеяси ташкил этилганининг 30 йиллиги билан чин қалбимдан табриклайман! Айни пайтда вилоятимизда 50дан ортиқ элат вакиллари аҳил-иноқ яшаб келмоқда. Вилоятимизда миллий бирдамликни мустаҳкамлаш, фаровонликка кўмаклашиш борасида изчил ишлар амалга оширилмоқда. Юртимизда эзгулик ва саховат бардавом бўлсин, – деди у.

Тадбир давомида меҳмонлар эътиборига Қозоғистон халқи Ассамблеясининг 30 йиллигига бағишланган вилоят этномаданият бирлашмаларининг кўргазмаси ҳавола қилинди.

Бирлик ва тотувлик рамзи бўлган байрам маданият соҳаси санъаткорлари ва этномаданият бирлашмалари бадиий ҳаваскорлари томонидан тайёрланган концерт дастурига уланиб кетди.