ҚР Қишлоқ хўжалиги вазирлиги ҳамда вилоят ҳокимлиги шафелигида қишлоқ хўжалиги соҳасида амалга оширилаётган лойиҳалар билан яқиндан танишиш мақсадида ОАВ вакиллари учун Арис, Сайрам, Байдибек ва Тулкибош туманларига махсус сафар уюштирилди. 

Журналистлар дастлаб Сайрам туманининг Қайнарбулоқ қишлоқ округидаги «Gen Group Kazakhstan» МЧБнинг банан етиштирувчи иссиқхона мажмуаси фаолияти билан танишдилар. Ҳозирда компания 5,3 га майдонда иссиқхона барпо этиб, банан етиштирмоқда. 

– Етиштирилган банан навлари Қозоғистоннинг иқлим шароитига мослашган, – дейди корхонанинг бошқарувчи директори Ислам Алиев. – Келгусида иссиқхонани яна 5 гектарга кенгайтириш режаланган. 

Замонавий иссиқхонада йилига минг тоннага яқин банан етиштирилади. 30 нафар фуқаро доимий иш билан таъминланган. Қозоғистонда ягона ҳисобланган корхонага барча жиҳозлар Туркиядан келтирилган. Ҳозирги кунда маҳсулотлар ички бозорда сотилмоқда. 

Шундан сўнг ОАВ вакиллари Қорасув қишлоғида «Ауыл аманаты» дастури доирасида ташкил қилинган «Аят-Агро» ИЧШнинг полиз маҳсулотларини қайта ишлаш цехи фаолияти билан танишдилар. Хусусий тадбиркор Иброхим Саражов 29,5 млн. тенге кредит олиб, меваларни қайта ишлаш цехи учун зарур ускуналар харид қилган. Ҳозирда 30 нафар фуқаро доимий иш билан таъминланган.

Шунингдек, журналистлар Оқсувкент қишлоғида жойлашган «Айкан» сутни қайта ишлаш заводига ташриф буюрдилар. Дарҳақиқат, “Эмир” бренди орқали танилган корхона 2023 йили қишлоқ хўжалик маҳсулотларини ишлаб чиқарувчи пешқадам жамоа сифатида ҚР Президентининг “Алтын сапа” мукофоти совриндори бўлгани бежиз эмас.

– 80 киши доимий иш билан таъминланган заводда бир кеча-кундузда 100 тонна сут қайта ишланади, – дейди завод бош директори Алмагул Айкан. – Бугунги кунда Туркия технологияси асосида пишлоқнинг 14 тури ишлаб чиқарилмоқда. Корхона сут, айрон, қаймоқ, пишлоқ каби юқори сифатли маҳсулотларни мамлакатимизнинг турли ҳудудларига етказиб бермоқда. 

ОАВ вакиллари сафар доирасида Манкент қишлоғидаги «Nurym Group» МЧБнинг омухта ем заводи ва мол бўрдоқилаш майдони фаолияти билан танишдилар. Қиймати 2,3 млрд. тенге бўлган заводда бир йилда 46 минг тонна омухта ем тайёрланади. Бу ерда 10та одам доимий иш билан банд.

Қиймати 5,1 млрд. тенге мол бўрдоқилаш майдонида йилига 10 минг тонна гўшт тайёрланади. 40 киши доимий иш билан таъминланган. Корхона маҳсулотлари ички бозорда сотилмоқда ва Ўзбекистонга импорт қилинмоқда.