Қозоғистон Президенти Қасим-Жўмарт Тўқаев Астана шаҳрига расмий ташриф билан келган Туркманистон Вазирлар Маҳкамаси раиси ўринбосари, ташқи ишлар вазири Рашид Мередовни қабул қилди. 

Давлат раҳбари Қозоғистон-Туркманистон муносабатлари барча соҳаларда дўстлик, яхши қўшничилик ва стратегик ҳамкорлик руҳида изчил ривожланиб бораётганини таъкидлади.

Мулоқот чоғида Қ. Тўқаев Туркманистонни Халқаро Тинчлик ва ишонч йилининг бошланиши билан табриклади.

Муштарак сиёсий ирода туфайли кейинги йилларда Қозоғистон-Туркманистон муносабатларига мутлақо янги руҳ бағишлангани ва икки томонлама ҳамкорлик стратегик тус олгани таъкидланди.

Давлат раҳбари Туркманистоннинг тинчликпарвар ташаббуслари аҳамиятини қайд этиб, Қозоғистон уларни муваффақиятли амалга оширишда бундан буён ҳам ҳар томонлама қўллаб-қувватлашга тайёрлигини маълум қилди.

Икки мамлакат ўртасида иқтисодий ҳамкорликнинг юқори суръати сақланиб, томонларни қизиқтирган долзарб масалалар амалий тарзда илгари сурилмоқда.

Учрашув давомида мамлакатларимиздаги улкан салоҳиятни қардош халқларимиз манфаатлари йўлида ишга солишнинг кенг имкониятларидан фойдаланиш ва самарали дастакларни жорий қилишга алоҳида эътибор қаратилгани таъкидланди.

Ўз навбатида, Рашид Мередов Қозоғистон Президентига Туркманистон Президенти Сердар Бердимуҳамедов ва Туркман халқининг Миллий етакчиси, Туркманистон Халқ Маслаҳати Раиси Гурбангули Бердимуҳамедовнинг самимий саломларини етказди.

Дипломатнинг сўзларига кўра, Қозоғистон-Туркманистон ҳамкорлиги стратегик хусусият ва узоқ муддатли истиқболга эга. Шу нуқтаи назардан, Туркманистон вакиллари Ашхободнинг Астана билан давлатлараро муносабатларини, барча соҳалар бўйича ҳамкорликни янада кенгайтириш тарафдори эканлигини таъкидлади.

Учрашувда энергетика, транзит-транспорт, маданий-гуманитар соҳаларда аввал эришилган олий даражадаги келишувлар ижроси муҳокама қилинди.