Шимкент шаҳрида “Кредит кооперацияси. Фарқини ўрган!” мавзуида кредит биродарликларининг Биринчи халқаро форуми ўтди.

Қозоғистон Республикаси қишлоқ хўжалиги вазирлиги, “Аграр кредит корпорацияси” ҲЖ, “Аграр саноат кредит биродарликлари ҳамжамияти” ҳуқуқий шахслар бирлашмаси ташкил этган анжуманда Жанубий Қозоғистон вилояти ҳокими Жансейит Туймебаев қатнашди ва нутқ сўзлади. 

– Давлат раҳбари Қозоғистон халқига Мактубида кредитлар ва молиявий хизматлар кўрсатиш тармоқларини кенгайтириш зарурлигини таъкидлаганди, – деди минтақа раҳбари. – Шунингдек, Элбоши Иқтисодий ҳамкорлик ва тараққиёт ташкилоти аъзолари бўлган мамлакатлар андазаларига кўчишни топширган. Қишлоқ хўжалиги товар ишлаб чиқарувчилари учун молиялаштириш имкониятлари мавжудлиги эса аграр шўъбанинг рақобатбардошлигини кўрсатувчи жиҳатлардан биридир. Шунинг учун ҳам мен бугунги тадбир иштирокчиларига миннатдорчилик билдириб, тиғиз ҳамкорлик қилишга чорлайман.

Форумда Қозоғистон, Россия, Литванинг 200дан ортиқ ширкати, молия муассасалари, бошқа ташкилотлар вакиллари иштирок этишди. 

***

Мамлакатимизда кредит ширкатлари 16 йилдан буён фаолият юритиб келмоқда. Уларнинг сони 187 тага, иштирок этаётган қишлоқ хўжалик товар ишлаб чиқарувчилари эса 15 минг хўжаликка етган. Улар орқали жами 40 мингдан ортиқ хўжаликка 241 млрд. тенге кредит берилган.