Вилоят ҳокими Дархан Сатибалди Келес туманига хизмат сафари билан бориб, ўзига хос корхонанинг фаолияти билан танишди. У Биртилек қишлоғидаги “Келес Пласт” МЧБнинг қайта ишлаш цехида бўлди.

Мазкур цех 2018 йилдан буён қишлоқ хўжалиги соҳасида кенг қўлланиладиган зарур пленка, зичланган ип, шунингдек, иссиқхонага мўлжалланган қисқич, кўчат етиштиришга мўлжалланган идиш турларини ишлаб чиқармоқда. Нуржан Ўмаров етакчилик қилаётган корхонада иссиқхона мажмуаси учун зарур буюмлар ишлаб чиқарилмоқда. Шунингдек, ўтган йили томчилатиб суғоришга мўлжалланган буюмлар ишлаб чиқаришни йўлга қўйди. Бу лойиҳа вилоят делегацияси ва тадбиркорларнинг Хитой давлатига сафари натижасида амалга оширилди. Корхона соатига 12 минг метр маҳсулот ишлаб чиқариш қувватига эга.

Тадбиркор билан учрашган Дархан Сатибалди ушбу йўналишдаги лойиҳаларни кўпайтириш муҳимлигини таъкидлади. Шунингдек, тадбиркорнинг ушбу ташаббусини қўллаб-қувватлаб, маҳаллий маҳсулот ҳажмини ошириш зарурлигини таъкидлади. 

Цех фаолияти билан танишгач, вилоят ҳокими Келес тумани тадбиркорлари томонидан ташкил этилган маҳаллий маҳсулотлар ва лойиҳалар кўргазмасини кўздан кечирди. Мутасадди бошқармалар ва туман ҳокимига корхоналарни кўпайтириш, янги иш ўринларини очишга доир топшириқлар берилди.