Туркистон шаҳрининг “Бекзат” кичик туманида жойлашган индустриявий минтақада ҚР Саноат ва қурилиш вазири Қанат Шарлапаев вилоятимизда фаолият юритаётган корхона раҳбарлари, тадбиркорлар билан учрашув ўтказди.

Туркистон индустриявий минтақасида яқин уч йилда 17701та янги иш ўринлари яратиш имконини берадиган (қиймати 2,2 трлн. тенге) 145та лойиҳани ҳаётга тадбиқ этиш кўзда тутилмоқда.

Хусусан, жорий йилда умумий қиймати 116,8 млрд. тенгени ташкил этувчи (2195та янги иш ўрни яратилади) 44та лойиҳани амалга ошириш режаланмоқда. Туркистон вилояти ва мамлакатимизнинг турли минтақаларида фаолият юритаётган ташкилот раҳбарлари ва тадбиркорлар, хусусан, Гулмира Абишева, Нурлан Шерхонов, Мадихон Собировлар ишлаб чиқариш, қурилиш, электр, транспорт, темирйўл хизмати, таъминот, нарх-наво, иш кучи каби турфа масалалар юзасидан вазирга ҳамда вилоят ҳокимининг ўринбосари Нуралхан Кўшеровга мурожаат қилиб, атрофлича жавоб олдилар. 

Қ. Шарлапаев ҚР Президенти Қ. Тўқаев тавсияси билан Ҳукуматимиз томонидан тадбиркорликни қўллаб-қувватлаш, ривожлантириш ҳамда янги иш ўринларини барпо этиш борасида амалга оширилаётган тадбирлар, давлат бюджетидан ажратилаётган маблағлар ҳақида маълумот берди.