Жанубий Қозоғистон вилоят ҳокимлигининг “Оңтүстік” МСМ билан Сингапур сармоявий компанияси ўртасида ҳамкорлик меморандуми тузилди. Унинг асосий мақсади – минтақавий сармоя маркази лойиҳаларига инвестиция жалб этиш ва экспорт салоҳиятини кучайтиришдан иборат.

Сингапур сармоя жамғармаси қошидаги компания Таиланд, Мўғулистон ва Буюк Ипак йўлидаги дав­латларга салмоқли сармоя ажратиб келаётганини алоҳида таъкидлаш жоиз. Мазкур ҳамкорлик жаҳон ҳамжамиятида етакчи сармоявий жамғармалар инвестициясини мамлакатимизга тортишда муҳим аҳамият касб этади.

Шимкент шаҳрида халқаро сармоя хабини ташкил этиш масалаларини муҳокама этиш жараёнида Сингапур компаниясининг иштироки ҳам алоҳида тилга олинди. 

Жанубий Қозоғистон вилояти тадбиркорликни ривожлантириш борасида фаол ва етакчи минтақа ҳисобланади. Меморандум доирасида хорижлик инвесторларга 100та ижтимоий-тадбиркорлик лойи­ҳаси тақдим этилади. Шундан сўнг, лойиҳаларни амалга ошириш учун стратегик шериклар танлаб олинади.

Таъкидлаш жоизки, “RIC ON EXPORT” экспорт салоҳиятини ривожлантириш дастури доирасида вилоят масҳулотларига талаб кучли бўлган Хитой ва Жануби-Шарқий Осиё мамлакатларига экспорт ҳажмини оширадиган лойиҳаларни сармоялаш ишларини икки томоннинг ҳам чуқур таҳлил қилишига келишиб олинди.