13-14 май кунларида Астанада ЭКСПО-2017 халқаро кўргазмасига бағишланган Жанубий Қозоғистон вилояти қишлоқ хўжалиги маҳсулотларининг ярмаркаси ўтди.

Шунинг учун вилоятимиз қишлоқ хўжалик товар ишлаб чиқарувчилари қиймати 135,6 млн. тенгелик 262 тонна маҳсулот ортилган карвонни Астанага жўнатдилар. Шундан, йилқи гўшти – 22 тонна, курка гўшти – 15 тонна, ун маҳсулотлари – 10 тонна, помидор – 71 тонна, бодринг – 71 тонна, сут маҳсулотлари – 7 тонна, колбаса маҳсулотлари – 3 тонна, балиқ маҳсулотлари – 3 тонна, қимрон – 1 тонна, тухум – 10 минг дона .

– Сиёсий аҳамиятга эга тадбирни юқори даражада ўтказишга элимизнинг барча вилоятлари қизғин тайёргарлик кўрмоқда. Жануб минтақаси ҳам ўз улушини қўшмоқда. Бугунги тадбир бунинг аниқ исботи. ЭКСПО кўргазмасига Жанубнинг хўжаликлари дастлабки маҳсулотларини жўнатди. Уларни Астанага етказиш учун музлатгичлар билан таъминланган 25 транспорт хизмат қилди, – деди вилоят ҳокимининг ўринбосари Бауржан Жамалов. 

Жанубий Қозоғистон вилояти ЭКСПО кўргазмаси чоғида 6 марта ярмарка ўтказади. Шу оралиқда Жануб хўжаликлари қишлоқ хўжалиги маҳсулотларининг 28 туридан 12 минг 976 тонна жўнатишади. Бунинг учун вилоятдаги  35та йирик ҳамда ёрдамчи хўжаликлар ва корхоналар танлаб олинган.

Айтиш жоизки, маҳаллий маҳсулотларимиз шаҳар фуқаролари ва меҳмонларга ярмаркаларда тавсия этилади.