ЖАНУБИЙ ҚОЗОҒИСТОН ВИЛОЯТИДА ЯНГИ ЭЛЕКТР УСКУНАСИ ЎРНАТИЛАДИ.

Минтақанинг энг чекка аҳоли манзилларида жойлашган чорва хўжаликларини электр энергияси ҳамда ичимли сув билан таъминлаш мақсадида вилоят ҳокимининг ўринбосари Ж. Бўкенбаев германиялик профессорлар билан учрашди.  Музокараларда Бонн университетининг профессори Штефан Курцман, Қуёш энергетикаси институтининг директори Ульф Герман, мазкур институтнинг қайта тикланадиган энергия манбалари департаментининг раҳбари Криштиану Боуран ҳамда М. Ауезов номидаги Жанубий Қозоғистон давлат университетининг катта ўқитувчиси, профессорлари иштирок этишди.

Томонлар Германиянинг Юлих шаҳридаги Қуёш энергетикаси институтининг махсус лойиҳасини Жанубий Қозоғистон вилоятида амалга ошириш масаласини муҳокама қилдилар.

Шунингдек, профессор Ш. Курцман 

М. Ауезов номли ЖҚДУ ҳамда Германиянинг Қуёш энергетикаси институти орасида тиғиз ҳамкорлик ўрнатилиб, янги технологияларни ривожлантириш йўналишида қатор илмий-текшириш ишлари юритилаётганини маълум қилди.

Ушбу махсус кўчма ускуна асосан қуёш энергияси билан ишлайди. Лойиҳа тўлиқ таҳлил қилиниб, ускуналар вилоятимизда ўрнатиладиган бўлса, қўшимча иш ўринлари очилади.

 Икки мамлакат университетлари учун умумий таҳлил лойиҳаси бўлмиш инновациявий янги технологияларни ривожлантириш ГФР Таълим вазирлиги томонидан молиялаштирилади. Учрашув сўнггида Жақип Қуттибекули мазкур лойиҳанинг вилоятимиз учун жуда долзарб эканлигини таъкидлаб, вилоят ҳокимлиги томонидан германиялик делегатларга ҳар томонлама ёрдам кўрсатилишини қайд этди.