Куни кеча 4-шўъба штабида Арис шаҳрини тиклаш ишлари юзасидан брифинг ўтди. 

Унда ҚР Индустрия ва инфратузилмавий ривожланиш вазири ўринбосари Қайирбек Ўскенбаев, вилоят ҳокимининг маслаҳатчиси Уласбек Садибеков, Мудофаа вазирлигининг вакили Қайиргелди Хусаинов, вилоят клиник касалхонасининг бош шифокори Марат Пашимов, Манғистов вилояти ҳокимининг ўринбосари Нурдаулет Қилибай иштирок этишди. Вилоят ҳокимининг маслаҳатчиси У. Садибеков шаҳар аҳолисига тушунтириш ишларини юритиш учун 800га яқин фаол жалб этилганини маълум қилди.

– Арисликлар учун келгусида кенг қамровли ишлар амалга оширилади. Ушбу ҳафтанинг охирида қишлоқ хўжалиги маҳсулотларининг ярмаркаси иккинчи марта ўтказилиб, уларни шаҳарликлар арзон баҳода харид қилишяпти. 

 ҚР Индустрия ва инфратузилмавий ривожланиш вазири ўринбосари Қайирбек Ўскенбаев бугунги кунда уйларни тиклаш ишлари жадал амалга оширилаётганини айтди.

– Дастлабки маълумотларга кўра 27та уй яшаш учун хавфли деб топилса, баҳолаш натижалари бўйича уларнинг сони 149тага етди. Барча уйлар баҳоланяпти. Яқин кунларда батамом тикланади, – деди Қ. Ўскенбаев. ҚР Мудофаа вазирлигининг вакили Қайиргелди Ҳусайнов айни кунда Арис шаҳридан 20 чақирим олисдаги ҳудудларни тозалаш ишлари юритилаётганини, омбор ҳам тозаланишини маълум қилди. Вилоят клиник касалхонасининг бош шифокори М. Пашимов офат оқибатлари туфайли касалхонага тушган 65 бемор соғайиб, уйларига қайтганини, ҳозир арислик 3 киши даволанаётганини ва уларнинг аҳволлари қониқарли эканлигини маълум қилди. Арис шаҳридаги 4 шўъбага масъул Манғистов вилояти ҳокимининг ўринбосари Н. Қилибай мазкур ҳудуддаги уйларни баҳолаб, тиклаш ишлари жадал кетаётганини маълум қилди.