Қозоғистоннинг маънавий пойтахти, қадим шаҳар Туркистоннинг тарихи теран, келажаги порлоқ, бугуни ғаниматдир.
Бир йил муқаддам бу қадим ва навқирон шаҳар Туркистон вилоятининг марказига айланган эди. Шаҳар тасарруфидаги қишлоқлар тўлиқ Кентовга берилди. Аҳолиси 96 мингни ташкил этувчи Кентов эндиликда 200 минг одам яшовчи улкан шаҳар. Чегараси кенгайиб, ер майдони 774512 гектарга етди.
100 мингга яқин аҳоли ва ўз улушидан анчагина ерни Кентовга берган Туркистоннинг мегаполис, яъни, азим шаҳарга айланиб, қанотини кенг ёйиб парвоз қилишига ишончимиз комил. Вақти келиб, Туркистон ҳам Шимкент каби, атрофидаги Кентов, Ўтрор, Сўзоқларни ўз ичига олган улкан марказга айланар.
Туркистоннинг тарихи эрамиздан аввалга 500-йилларга бориб тақалади. Х асрда Шавгар (Шавагар) деб номланса, XII асрдан – Ясси деб аталган. XVI асрдан Ҳазрати Туркистон номи билан ҳам машҳур. XVI – XVIII асрда Қозоқ хонлиги марказига айланган ушбу маскан бутун туркий оламнинг ҳам маънавий, ҳам маданий пойтахти бўлган.
Замонавий Туркистон тарихида ХХ асрнинг иккинчи ярми ўчмас из қолдирди. Шаҳар йирик маданий-маърифий ва сайёҳлик марказига айланди. 13та саноат корхонаси барпо этилди. Булар – «Ясси» пахта заводи, «Қуат» машинасозлик заводи, «Туркистон Агрореммаш» ҲЖ, тикув-трикотаж заводи ва бошқалар. Ҳозирги кунда бу ерда «Антибиотик» заводи, «Парабе» Қозоғистон-Британ қўшма корхонаси ва бошқалар фаолият юритмоқда. «Оренбург – Тошкент» темир йўли ҳам ушбу шаҳардан ўтади. 1991 йили шаҳарда 13 факультетга эга Туркистон университети очилди. 1993 йилдан у Х. Яссавий номидаги Халқаро қозоқ-турк университети деб атала бошлади. Бу олий ўқув юртида 22 минг талаба таҳсил олмоқда ва улар сони бўйича дорилфунун Марказий Осиёдаги энг йирик илм даргоҳи ҳисобланади.
Қадимий, навқирон ва шу билан бирга, замонавий шаҳар бутун дунёдан келган кўплаб меҳмонлар ва сайёҳларда ўчмас таассурот қолдирмоқда. Туркистон – келажак авлодларга мерос қилиб қолдиришга арзигулик муҳташам меъморчилик обидалари, мадрасалар, масжидлар, музейларга бой шаҳардир.
Бу ерда Қозоғистоннинг энг муқаддас тарихий ёдгорлиги – Ҳазрат Аҳмад Яссавий мақбараси жойлашган. Ушбу тарихий ёдгорлик буюк саркарда қурдирган ва сақланиб қолган энг катта мажмуа ҳисобланади. Мақбара, масжид ва мадрасани ўз ичига олган мажмуани Амир Темурнинг ўзи лойиҳалаштиргани, ўлчовларни чизиб бергани манбаларда келтирилган. 1385 йили қурилиши бошланган мажмуа 1405 йили – Темур вафоти билан тўхтайди. Мажмуанинг фақатгина кириш меҳроби тугалланмай қолган, холос.
Мажмуанинг кириш қисми меҳроби баландлиги 37,5 метр, деворининг қалинлиги 2 метр. Хонақоҳ девори қалинлиги 3 метр. Асосий гумбазнинг баландлиги 44 метр, диаметри – 20 метр. Мажмуа ичида мақбара, масжид, кутубхона, катта ва кичик сарой, 35та ҳужра, қудуқхона, ошхона мавжуд. Ҳазрат Аҳмад Яссавий мақбараси ЮНЕСКО томонидан “Жаҳон маданияти ёдгорликлари” рўйхатига киритилган.
Ҳозирги кунда Туркистонда кенг қамровли ободонлаштириш ҳамда бунёдкорлик, таъмирлаш, шаҳарнинг ижтимоий инфратузилмасини ривожлантириш ишлари режали равишда олиб бориляпти. Шаҳар катта бунёдкорлик майдонини эслатади.
Қозоғистон харитасидаги 17-ҳудуднинг келажаги порлоқ, чунки унинг тараққиётини Элбошининг ўзи назоратга олган. Давлат раҳбарининг топшириқларини бажариш мақсадида ҚР Бош вазирининг биринчи ўринбосари А. Мамин раислигида Туркистон шаҳрининг туркий оламнинг маданий ва маънавий маркази сифатида ривожланишига таъсир кўрсатадиган Бош режасини ҳозирлаш билан шуғулланувчи Ҳукумат комиссияси фаолият юритмоқда.
Мазкур тарихий шаҳар Элбошининг топшириғига мувофиқ, Қозоғистоннинг маънавий маркази йўналишида ривожлантирилади. Туркистонда қуриладиган уйлар осмонўпар бўлмайди. Сабаби, улар Хожа Аҳмад Яссавий мақбарасидан баланд бўлмаслиги керак. Мақбара ҳамма томондан кўриниб туриши лозим. Шунингдек, бошпаналар Марказий Осиё, яъни қадимий давр меъморий услубида қурилиши лозим. Шунда элимиздаги, ҳеч бўлмаса, битта шаҳар шарқона ўзгача қиёфа кашф этади.
Туркистон шаҳрини сайёҳлар учун қулай минтақага айлантириш мақсадида бу ерда янги аэропорт, темирйўл, автовокзал ҳамда меҳмонхоналар, овқатланиш мажмуалари қурилади.
Шаҳарда Х. А. Яссавийга тегишли қимматбаҳо буюмларнинг кўплиги сабабли махсус Яссавий музейи бунёд этмоқда.
Янгидан ишланган ва Элбоши шахсан тасдиқлаган Бош режага мувофиқ, шаҳар майдони 35 минг гектарга кенгайган.
Туркистоннинг вилоят марказига айлантирилиши – Мустақилликнинг, барқарорлик ва тинчликнинг меваси. Вақти келиб Туркистон ижтимоий-иқтисодий соҳадаги ютуқлари, заҳматкаш ва меҳмондўст одамлари, билимли йигит-қизлари билан тилларда достон бўлишига ишончимиз комил.