Жанубий Қозоғистон вилоят ҳокими Жансейит Туймебаев “Қазақинвест” Миллий компанияси ҳиссадорлик жамияти раиси ўринбосари Бижан Қанешов билан учрашди. Учрашув давомида Б. Қанешов вилоятимиз раҳбарини мазкур ташкилотнинг минтақавий идораси раҳбари Шахизат Матаев билан таништирди. 

– Компаниянгиздан умидимиз катта, – деди Ж. Туймебаев. – Вилоятнинг иқтисодий имкониятлари жуда юксак. Биз барча соҳаларда ҳамкорлик қилишга тайёрмиз. Минтақанинг сармоявий жозибадорлиги юқори. Қишлоқ хўжалиги, чорвачилик, туризм, енгил саноат, машинасозликда айниқса имкониятлар зўр. Биз шаффоф ишлашга ва “Қазақинвест” Миллий компанияси ҳиссадорлик жамиятига ҳар томонлама ёрдам беришга тайёрмиз. 

Ўз навбатида Б. Қанешов компания томонидан бюрократик тўсиқларни бартараф этиш борасида қилинаётган ишлар ва сармоядор томонидан амалга ошириладиган хизматларни электрон форматга ўтказиш борасидаги ҳаракатлар ҳақида маълумот берди. 

– “Қазақинвест” Миллий компанияси ҳиссадорлик жамияти Давлат раҳбари топшириғига кўра КazNextInvest базасида ташкил этилган. Биз икки ойдан буён ишлаяпмиз ва Қозоғистон иқтисодиётининг устувор йўналишларига бевосита сармоялар жалб этиш билан шуғулланамиз. Бу йўналишда биз Жанубий Қозоғистон вилоят ҳокимлиги ва маҳаллий компаниялар билан ишларни ташкил этиш ҳамда тизимли тартибга келтириш ниятидамиз. Компания хорижий вакилликлар ва филиалларга эга, у Ҳукумат номидан йирик инвесторлар билан музокаралар юритади, – деди Б. Қанешов.

Шуни ҳам айтиш жоизки, компания вазифаларига сармоявий лойиҳалар ишлаб чиқиш ҳамда мақсадга йўналтирилган сармоядорларни жалб этиш киради. Бундан ташқари, эришилган музокаралар мониторингини олиб бориш, “ягона дарча” тамойили асосида сармоявий лойиҳаларни рўёбга чиқаришда қўллов кўрсатади. 

Бугунги кунда сармоядорларни қўллаб-қувватлаш мақсадида компания “ягона дарча” тамойили асосида лойиҳаларни рўёбга чиқариш, виза, иш ва хизматлар кўрсатиш, ягона ахборий тизимда музокаралар ўтказиш орқали ушбу тизимни йўлга қўйиш юзасидан иш олиб бормоқда. Шуни ҳам айтиш жоизки, “Қазақинвест” Миллий компанияси ҳиссадорлик жамияти ходимлари ҳар бир лойиҳа учун шахсан жавобгар.