Қозоғистон Республикасида жорий йилги тўртинчи чорак ўзгача ўтганлиги барчага маълум. Шунга биноан мактаб ҳам бошқача тугамоқда. Жумладан, "Сўнгги қўнғироқ" ҳам масофадан жаранглади.

Жорий йилги "Сўнгги қўнғироқ"нинг  жарангги ҳам ўзгача. Сабаби, ўқув йилининг тугашига биноан уюштирилган байрам тадбири онлайн тартибда ўтказилди. 

Вилоятимиз мактабларидаги ушбу тадбир Давлат мадҳияси ила бошланиб, мактаб директорларининг видеотабриги ила давом этди. 

Дарҳақиқат, республикамизда жорий этилган фавқулодда вазият туфайли ўрин олган карантиндаги педагогик фаолият ҳам ўз маррасига етди. Бу ўқув йили ҳар бир устозу шогирд учун ўз воқеалари, ўз муваффақиятлари ила ёдда қолиши шубҳасиз. Юз берган қийинчиликларга қарамай, ўқув йилининг самарали бўлгани ҳақиқат.  Илм даргоҳларидаги ютуқлар бунинг ёрқин далилидир.

Ушбу жараёнда ота-оналарнинг ҳам фаол иштирокини кузатдик. Масофадан билим олишнинг озми-кўпми  ютуқларини қўлга киритдик. Ота-оналар устозлар билан ҳамжиҳатликда онлайн тартибда фаолият юритиб, бир-бирларига қўллов кўрсатдилар.

Умид қиламизки, келгуси янги ўқув йилида ўқувчилар синфхоналарда сабоқ олиб, билимини юксалтиришади. 

Ҳа, Ватанимизнинг сиёсий-иқтисодий аҳволи тараққиётига, чуқур билим билан унинг равнақ-ривожига ҳисса қўша оладиган ёш авлод мустақил ҳаётга учирма бўлди. Уларни олдинда юксак чўққилар, илму фан сўқмоқлари кутмоқда.

Ишонамизки, битирувчи йигит-қизлар элимизнинг рақобатбардош вакиллари бўла олишади.