Туркистон шаҳридаги “Буюк Дашт эли маркази” музейида Қозоғистон Республикаси Энергетика вазири ўринбосари Алибек Жамауов вилоят аҳолиси билан учрашув ўтказди. Йиғилишни вилоят ҳокимининг биринчи ўринбосари Зулпихар Жўлдасов олиб борди.

– Туркистон вилояти йирик миқдорда қайта тикланадиган энергия салоҳиятига эга минтақа. Бугунги кунда вилоят қайта тикланадиган энергия манбалари қуввати бўйича республикада биринчи ўринда. Вилоятда умумий қуввати 278 МВт бўлган 21та муқобил электростанция мавжуд. Унинг таркибига 16 МВт қувватга эга 8та қуёш электр станцияси ва 262 МВт қувватга эга 13та конденсация электр станцияси киради. 2025 йилгача 48 МВт қувватга эга 7та иншоот қуриш режаланмоқда, – деди у. 

Алибек Жамауов вазирлик томонидан соҳада амалга оширилаётган ишлар ҳақида маъруза қилиб, галдаги режалар билан ўртоқлашди. Ёқилғи-энергетика мажмуасидаги мавжуд вазият ва вилоятни газлаштириш муаммоларига тўхталди.

– Қуёшли кунларга бой мамлакатимизда қайта тикланадиган энергия манбаларини ўзлаштириш стратегиялари энди ишлаб чиқилмоқда. Гарчи, ҳозир қайта тикланадиган энергетика технологиялари учун харажатлар миқдори энергия олишнинг анъанавий технологиялари сарф-харажатларидан анча ошсада, бугунги кунда улардан фойдаланиш экологик жиҳатдан ҳам, иқтисодий ҳамда ижтимоий нуқтаи назардан ҳам ўта муҳим. Бу, ўз навбатида, мамлакатимизда энергия самарадорлиги ва хавфсизлигини ошириш жараёнини жадаллаштириш учун асос бўлиб хизмат қилади, – деди вазир ўринбосари.

Энергетика вазири ўринбосари Алибек Жамауов ва вилоят ҳокимининг биринчи ўринбосари Зулпихар Жўлдасов йиғилишда кўтарилган барча масалалар баённомага киритилиши ва қонун доирасида тегишли чоралар кўрилишини маълум қилди.

Учрашув сўнггида А. Жамауов аҳолини шахсий масалалари юзасидан қабул қилди.