Вилоят ҳокими Дархан Сатибалди раислигида минтақада қишлоқ хўжалигини ривожлантириш йўналишидаги анжуманлар ўтмоқда. Шундай тадбирлардан бири Сариоғоч туманида уюштирилди. 

Тегисшил қишлоғидаги иссиқлик тизимини талаб қилмайдиган, махсус тикилган ёпинчиқ ёрдамида иситиладиган “Абдураман” деҳқон хўжалигининг иссиқхона мажмуасида “Иссиқхоналардаги илғор тажрибаларни ҳаётга татбиқ этиш” мавзуида вилоят семинар-кенгаши ўтди.

Унда вилоят қишлоқ хўжалиги бошқармаси раҳбари Н. Бадирақов, туман ҳокимларининг ўринбосарлари, қишлоқ хўжалиги бўлими мудирлари, молия ташкилотлари вакиллари, иссиқхона билан шуғулланадиган тадбиркорлар иштирок этди.

Тадбир доирасида “Абдураман” деҳқон хўжалигининг иссиқхона мажмуаси фаолияти билан яқиндан таништирилиб, махсус тайёрланган жойда тажриба алмашиш мақсадида  мажлис ўтказилди. Мазкур иссиқхонада япон технологияси асосида қулупнай етиштирилади. Яна бир ўзига хослиги – махсус ёпинчиқли иссиқхона қуёш нури билан иситилади. Натижада қулупнай нархи сезиларли арзонлашиб, дастурхонимиз тўкинчилигига хизмат қилмоқда.