Сайрам тумани ҳокими Арман Сабитов туман фахрийлари ҳамда зиёлилари билан учрашди.

– Хабарингиз бор, Сайрам тумани вилоятимизда аҳоли зич жойлашган ҳудуддир. Иқтисодий кўрсаткичларимиз йилдан-йилга юксалмоқда. Бу ютуқларга халқимизнинг фидокорона меҳнати туфайли эришмоқдамиз. Туманимизнинг келгусида янада обод бўлиб, равнақ топишида сизнинг фикрингиз жуда муҳим. Бугун жамиятдаги муаммолар ва бошқа муҳим масалалар ҳақида сўз юритамиз, – деди у.

Тадбирда сўз олган туман фахрийлар кенгаши раиси Илес Айтжан, Қорамурт қишлоғи тўбебийи Абдуғаффор Маннонов, Қайнарбулоқ қишлоғи тўбебийи Уэш Бўрибекули, шунингдек, эл оғалари Ақилбек Қурманбеков ва Сейдуали Темирбаевлар фахрийларнинг жамиятдаги ўрни, миллий қадриятларга эътибор қаратиш ва ёшлар тарбияси ҳақида фикр билдирдилар. Дарҳақиқат, туман аҳолисининг ҳамжиҳатлигини мустаҳкамлаш, давлат муассасалари фаолиятини жонлантириш борасида ҳам  амалий таклифлар киритилди.

Арман Сабитули туманнинг келгусидаги тараққиёт режаси билан таништириб, аҳоли фаровонлигини ошириш ва коммунал муаммоларни ҳал этиш борасида амалга оширилаётган тадбирларга тўхталди. 

Учрашувга якун ясаган туман ҳокими билдирилган таклифлар  инобатга олинишини маълум қилди.