Вилоятимизда гулчилик билан шуғулланаётган деҳқонлар март ойида нишонланадиган Халқаро хотин-қизлар байрами арафасида лола, атиргул ва нилуфар гулларини савдога чиқаришди.

Сариоғоч тумани иссиқхоналарида маҳсулот етиштираётган деҳқонлар йилнинг тўрт фаслида мамлакатнинг барча ҳудудларига гул етказиб беришмоқда. Шу боис чегара ҳудуди «иссиқхоналар маскани» деб аталмоқда. Унумдор ер, қулай иқлимдан унумли фойдаланган деҳқонлар бир неча хил гулларни етиштирмоқда. Гуллар Алмати, Астана каби йирик шаҳарларга ҳам етказилмоқда. Байрам арафасида гулга талаб ортиши табиий. 

«Алия» деҳқон хўжалигида атиргулнинг «Қора сеҳр» ва «Голланд фридуми» навлари етиштирилади. Иссиқхонанинг майдони 4 гектарни ташкил қилади. 15 йилдан буён тадбиркорлик билан шуғулланиб келаётган деҳқон йилига 20-40 минг дона атиргул сотади.

Қазиғурт туманидаги “Пасека-бал” деҳқон хўжалиги раиси Азизбек Қосимов ҳам гулчиликни ривожлантирмоқда. 

– Ҳар йили 1 миллиондан ортиқ гул сотамиз. Гулзоримизда «Misty Bubbles», «Каталина», «Қора сеҳр» навли атиргулларни етиштирмоқдамиз, – дейди деҳқон.

Азизбек Қосимовнинг айтишича, гуллар Шимкент, Алмати, Қизилўрда шаҳарларига жўнатилмоқда. Уларнинг ўртача нархи 150-170 тенге. Бугунги кунда иссиқхонада 15 киши узлуксиз меҳнат қилмоқда. 

Таъкидлаш жоизки, республикада барпо этилган иссиқхоналарнинг 70 фоизи вилоятимизга тегишли, умумий ҳажми 1640 гектарни ташкил этади. Ўтган йили иссиқхоналарда 140 минг тонна маҳсулот етиштирилиб, республика аҳолисининг 42 фоизи сабзавот билан таъминланди.