Вилоят ҳокими Дархан Сатибалди Сўзоқ туманига хизмат сафари доирасида “Қазатомөнеркәсіп-Сауран” ҳиссадорлик жамиятининг ишлаб чиқариш корхонасида бўлди.

Корхона табиий уран, уран оксиди ишлаб чиқариш ва табиий ураннинг кимёвий концентратигача қайта ишлаш жараёнларини амалга оширади. 2006 йилда ташкил этилган компанияда 1000дан зиёд  одам меҳнат қилади. Уларнинг 95 фоизи маҳаллий аҳоли. Вилоят ҳокими корхона раҳбарияти билан қатор муҳим масалаларни муҳокама қилди.

– Маҳаллий аҳолини қўллаб-қувватлашни кучайтириш, биргаликда ижтимоий тадбирлар ташкил этишни тавсия қиламиз. Таълим муассасалари очиш мумкин. У ерда корхонага зарур мутахассисларни тайёрлаш даркор. Дунёнинг йирик корхоналари хайрия тадбирлари ўтказишга алоҳида эътибор қаратмоқда. Бу билан аҳолининг фаровон яшаши учун шароит яратилади. Шу боис бу борадаги ишларни кучайтиришни тавсия қиламиз. Ҳамкорликда иш юритайлик, – деди Дархан Сатибалди.

Бундан ташқари, вилоят ҳокими Таукент қасабасидаги “КАТКО” қозоқ-француз қўшма корхонасида бўлди. У 1996 йили ишга туширилган. Ўша йиллардан буён завод давлат сиёсатини амалга ошириб, мамлакатимиз иқтисодий тараққиётига ҳисса қўшиб келмоқда. Уран ишлаб чиқариш бўйича етакчи компания минтақадаги ижтимоий лойиҳаларга ҳам ҳомийлик қилмоқда.

Айни пайтда корхона таркибида уран бўлган руда ва фойдали қазилмаларни қазиб олиш, қайта ишлаш, ташиш, сақлаш каби фаолият турлари билан шуғулланмоқда. 

“КАТКО” 2009 йилдан буён маҳаллий иқтисодиётга 4,8 миллиард тенгедан ортиқ сармоя киритди.