Туркистонга Венгрия мамлакатидан делегация ташриф буюрди. Меҳмонларни Туркистон вилояти ҳокими Дархан Сатибалди шахсан қабул қилиб, музокаралар олиб борди. Минтақа раҳбари ҳамкорлик ўрнатиш, лойиҳаларни қўллаб-қувватлаш, янги иш ўринларини кўпайтиришдан манфаатдор эканлигини маълум қилди.

Венгриянинг Алматидаги бош консули Саболч Карой Ёке икки давлат ўртасидаги дўстлик ва иқтисодий муносабатлар жуда юксак даражада эканлигини айтиб, Венгрия сармоядорларини Қозоғистонга таклиф қилиш, ёрдам беришга тайёр эканлигини таъкидлади. 

“UBM GROUP” компаниясининг бош директори Хорват Петер илиқ қарши олган вилоят раҳбарига миннатдорчилик билдирди.

– Биз Туркистон вилоятида замонавий омухта ем заводи қуришни режалаштирмоқдамиз. Бу қишлоқ хўжалигининг тараққиётига туртки бўлади. Янги иш ўринлари очилади. Биз ҳамкорликни йўлга қўйиш ва бошқа лойиҳаларни муҳокама қилишга тайёрмиз, – деди венгриялик сармоядор.

Келгусида Венгрия сармоядори Туркистон вилоятида қатор саноат корхоналари қурилишини бошлайди. 

Мазкур йўналишда ишлар бошлаб юборилди.