Қозоғистон ва Ўзбекистон президентлари Қасим-Жўмарт Тўқаев ва Шавкат Мирзиёев Алмати шаҳрида норасмий учрашув ўтказишди.

Икки давлат раҳбарлари иштирокида Қозоғистон – Ўзбекистон ўртасида яхши қўшничилик, стратегик шериклик ва иттифоқчилик муносабатларини изчил мустаҳкамлаш масалалари атрофлича кўриб чиқилди.

Суҳбат аввалида давлат раҳбарлари бир-бирини ҳамда қардош халқларни баҳор айёми Наврўз ва Рамазон ҳайити билан самимий қутлади.

– Ушбу учрашув қардош ва дўст давлатлар ўртасидаги ҳамкорликни ривожлантириш борасида амалга оширилаётган ишлар юзасидан навбатдаги ишбилармонлик муҳокамаси учун қулай фурсатдир. Биз иттифоқдош давлатлармиз. Икки давлат ўртасидаги ҳамкорлик бутун Марказий Осиё минтақасидаги вазиятга бевосита таъсир кўрсатади, – деди Қозоғистон Президенти.

Давлат раҳбари Шавкат Мирзиёевнинг қардош халқларни бир-бирига яқинлаштириш, минтақани барқарор ва хавфсиз тараққий эттириш йўлидаги муштарак мақсадларни илгари суришдаги улкан ҳиссасини таъкидлади.

Ўзбекистон билан Қозоғистон ўртасидаги кўп қиррали ҳамкорлик юксак даражага кўтарилгани алоҳида мамнуният билан қайд этилди. Барча даражаларда фаол мулоқотлар олиб борилмоқда. Товар айирбошлаш ҳажми йил бошидан буён 14 фоизга ошди, умумий қиймати 4 миллиард доллардан зиёд сармоявий лойиҳалар портфели шакллантирилди, ҳудудлараро алоқалар ва маданий-гуманитар алмашинув ривожланмоқда.

Давлат раҳбарлари Ўзбекистон ва Қозоғистон Бош вазирлари ўринбосарларининг ўзаро савдо ҳажмини ошириш, машинасозлик, электротехника, нефть-газ, тўқимачилик, қишлоқ хўжалиги ва бошқа устувор тармоқларда етакчи корхоналарнинг кооперация лойиҳаларини илгари суриш бўйича кўрилаётган чора-тадбирлар тўғрисидаги ҳисоботларини тинглади.

Президентлар саноат кооперацияси бўйича узоқ муддатли дастурни шакллантириш, минтақавий аҳамиятга эга инфратузилмавий лойиҳаларни жадаллаштириш юзасидан олиб борилаётган тадбирлар муҳокама қилинди.

Ўзбекистон Президенти икки томонлама алоқаларни мустаҳкамлашга қаратилган бугунги учрашувнинг аҳамиятига тўхталди.

– Мени Алмати шаҳрида икки халқ анъаналарига содиқ ҳолда дўстона кутиб олганингиз учун ташаккур. Ўз номимдан ва халқим номидан миннатдорчилик билдираман. Сўнгги йилларда муносабатларимиз бутунлай янги босқичга кўтарилди. Биз – иттифоқдошлармиз. Ўзаро ҳурмат-эҳтиромимиз туфайли кўплаб масалалар ўз ечимини топмоқда, ўзаро келишувлар амалга оширилмоқда. Ҳақиқий натижалар бор. Сизни Қозоғистоннинг улкан ютуқлари билан табриклайман. Иқтисодиёт ривожланмоқда, ютуқларингиз юксак. Биринчи чоракни 5,4 фоиз билан якунладингизлар. Бугунги учрашувимиз расмий бўлмаса-да, мен катта гуруҳ билан келдим. Бироқ ҳар қандай норасмий учрашув муносабатларимизга, барча келишувларимиз амалга оширилишига янги суръат бағишлайди, – деди Шавкат Мирзиёев.

Жорий йилда Халқаро саноат кооперацияси марказини ишга тушириш юзасидан амалий ишларни бошлаш, қўшма ташқи савдо компанияси фаолиятини кенгайтириш муҳимлиги қайд этилди.

Минтақавий кун тартиби, шу жумладан, яқин ойларда Ўзбекистонда ўтказиладиган Марказий Осиё саммитларига тайёргарлик юзасидан фикр алмашилди.

Бўлажак икки ва кўп томонлама тадбирлар режаси ҳам кўриб чиқилди.