Вилоятда сайёҳлик соҳасини ривожлантиришнинг 2025-2029 йилларга мўлжалланган режаси  ишлаб чиқилди. Ушбу йўналишдаги тадбирлар ва режалар вилоят ҳокими девон мажлисида муҳокама қилинди. Вилоят ҳокими Нуралхан Кўшеров минтақанинг сайёҳлик имкониятларидан тўлиқ фойдаланилмаётганлигини таъкидлаб, мутасаддилар зиммасига тегишли топшириқлар юклади.

– Сайёҳлик соҳасига доир тасдиқланган кўрсаткичлар бажарилиши лозим. Вилоятдаги сайёҳлик иншоотларининг инфратузилмасини ривожлантириш мақсадида аниқ тадбирлар режасини ишлаб чиқишни топшираман, – деди Нуралхан Кўшеров.

Вилоят сайёҳлик  бошқармаси раҳбари Нурдаулет Медеуовнинг айтишича, 2029 йилга қадар минтақадаги сайёҳлар сонини 1миллион кишига етказиш кўзланган.  Шу орқали минтақанинг меҳмонхоналари ва сайёҳлик инфратузилмаси даражаси ва жозибадорлигини ошириш кўзда тутилмоқда. Шунингдек, табиий ҳудудларга келадиган туристлар сонини 200 минг нафарга, даволаш-соғломлаштириш марказларига келадиган сайёҳлар сонини 250 минг нафарга етказиш режаланмоқда.

Ўтган йили Италиянинг “AIpin Tour”, “Tomiris Travel” компаниялари ва ҳамкорларига Туркистон вилоятининг сайёҳлик дастурлари таништирилди.  Бунинг самараси ўлароқ, яқинда вилоятимизга Италиядан 24 гуруҳ (ҳар бир гуруҳда ўртача ҳисобда 20-25 сайёҳ)нинг икки кунлик дастур билан келиши кутилмоқда.