KAZINFORM. ҚР Президенти ўтган 30 йил мобайнида Қозоғистон ва Словения ўртасида ўзаро ҳурматга асосланган мустаҳкам сиёсий ва дипломатик алоқалар ўрнатилганини таъкидлади, дея хабар беради Ақўрданинг матбуот хизмати.

– Қозоғистон иқтисодиёти жадал ривожланаётган минтақадаги энг йирик давлатлардан биридир. Ўтган йили мамлакат иқтисодиётининг ўсиши 4,8 фоизни ташкил этди. Бу тахмин қилинган дунёвий ўсишдан 1,5 баравар юқори. Биз кенг кўламли сиёсий ва иқтисодий ислоҳотларни амалга ошириш орқали ушбу тараққиёт кўрсаткичларини сақлаб қолишни кўзламоқдамиз, – деди Қ. Тўқаев.

Президент Қозоғистон Евроосиёда етакчи савдо-логистика марказига айланишга интилаётганини, стратегик жойлашуви бунга имкон беришини таъкидлади.

– Ўтган йили мамлакатимиз бўйлаб юк ташиш ҳажми рекорд даражага етиб, 514 тонна-чақиримга етди. Ҳозирда Қозоғистон Европа ва Хитой ўртасидаги қуруқликдаги транспортнинг 90 фоизини таъминлайди. Биз “Ўрта даҳлиз” ва “Шимол-жануб” каби халқаро транспорт йўналишларини ривожлантиришни ўз зиммамизга олдик. Каспий денгизида юк ташишда Ақтау ва Қуриқ портлари муҳим ўрин тутади. Ўтган йили ушбу денгиз портларидан жўнатилган юк ҳажми 4,5 миллион тоннага етди. Бу – рекорд натижа. Бу борада транспорт алоқаларини мустаҳкамлаш ва савдони рағбатлантириш мақсадида Словениянинг энг йирик Копер порти билан тажриба алмашиш ва ҳамкорликни чуқурлаштириш ниятидамиз, – деди Қ. Тўқаев.

Давлат раҳбари саноат ва энергетика соҳаларидаги ҳамкорликни икки томонлама муносабатларнинг истиқболли йўналиши сифатида қайд этди. Президентнинг сўзларига кўра, Қозоғистон нефтининг 70 фоизга яқини Европа Иттифоқига экспорт қилинади. Ўрганилган табиий газ захиралари 3 триллион куб метрни ташкил қилади. Кўмир захиралари 34 миллиард тоннани ташкил этиб, мамлакатни дунёнинг биринчи ўнталигига киритди.

– Бугунги кунда Қозоғистонда Европа Иттифоқи иқтисодиёти учун алоҳида аҳамиятга эга бўлган 34та ноёб минераллардан 19таси қазиб олинади. Бу соҳа салоҳиятидан тўлиқ фойдаланиш мақсадида жаҳоннинг етакчи компаниялари билан прагматик формула бўйича, яъни “хомашё ўрнига сармоя ва технология” тамойили асосида ҳамкорлик қиламиз. Кўплаб йирик халқаро компаниялар Қозоғистонда яшил энергияга сармоя киритмоқда, жумладан, Франциянинг Total, Италиянинг Eni, Бирлашган Араб Амирликларининг Masdar, Германия ва Швециянинг Svevind Energy Group. Бозоримизда Словениянинг Iskra, Gorenje каби етакчи компаниялари муваффақиятли фаолият юритмоқда, – деди ҚР Президенти.

Давлат раҳбари мамлакатда қишлоқ хўжалигига алоҳида эътибор қаратилаётгани, бу соҳа жаҳон озиқ-овқат хавфсизлиги муаммосини ҳал этишда муҳим ўрин тутаётганини таъкидлади. Бугунги кунда мамлакат қишлоқ хўжалиги маҳсулотлари дунёнинг 70дан ортиқ давлатига экспорт қилинмоқда.

Қ. Тўқаев Қозоғистон агросаноат мажмуасини юқори технологияли шўъбага айлантириш режаси ҳақида маълум қилди ва словениялик ҳамкорларни қўшма сармоявий лойи­ҳаларни амалга оширишга таклиф қилди.

Президентнинг таъкидлашича, фармацевтика соҳасида Словениянинг Krka, Lek каби етакчи компаниялари билан ҳамкорлик маҳаллий ишлаб чиқаришни кўпайтириш ва мамлакатнинг технологик салоҳиятини кенгайтиришга хизмат қилади.

Бундан ташқари, Давлат раҳбари Словениянинг жадал ривожланаётган инновацион IT соҳасини илмий тадқиқотлар, стартаплар ва технологик таълим йўналишларида ҳамкорликни йўлга қўйишга чақирди.

Қозоғистон Президенти молиявий хизматлар ва сармоялар соҳасидаги алоқаларга алоҳида эътибор қаратди. У Словения ишбилармон доиралари вакилларини Астана халқаро молия маркази салоҳиятини ўрганишга ва ушбу экотизимга қўшилишга таклиф қилди.